நீலகிரி மாவட்டம், குன்னூர் காட்டேரி மலைப்பாதையில் நடந்த ராணுவ ஹெலிகாப்டர் விபத்தில், முப்படைகளின் தலைமைத் தளபதி பிபின் ராவத், அவர் மனைவி உட்பட மொத்தம் 13 பேர் உயிரிழந்தனர். பயணித்த 14 பேரில் 13 பேர் இறந்துவிட்ட நிலையில், ஒருவர் மட்டும் பெங்களூர் மருத்துவமனையில் தீவிர சிகிச்சை பெற்றுவருகிறார்.

இதனிடையே ராணுவ ஹெலிகாப்டர் விபத்தில் உயிரிழந்த நாயக் ஜிதேந்திர குமார் மத்தியப்பிரதேச மாநிலம், செஹோர் மாவட்டத்திலிருக்கும் தமண்டா கிராமத்தைச் சேர்ந்தவர். 3 பாரா சிறப்புப் படையைச் சேர்ந்த ஜிதேந்திர குமார், பிபின் ராவத்தின் முதன்மைப் பணியாளர் அதிகாரியாகவும் பணியாற்றிவந்தார். எட்டு ஆண்டுகள் ராணுவத்தில் பணியாற்றிவந்த அவருக்கு, மனைவியும், நான்கு வயதில் ஒரு மகளும், ஒரு வயதில் மகனும் இருக்கின்றனர். அவரது மறைவு அம்மாநிலத்தில் சோகத்தை ஏற்படுத்தி உள்ளது.