ஆனால் இன்றைய தினம் ஞாயிற்றுக்கிழமையாக இருந்தாலும் முறைப்படி பிப்ரவரி 1-ந் தேதி பட்ஜெட் தாக்கல் செய்யப்பட வேண்டும் என்று அரசு உறுதியாக இருப்பதன் அடிப்படையில் இன்று காலை 11 மணிக்கு தாக்கல் செய்யப்படுகிறது.

பட்ஜெட்டை காலை 11 மணிக்கு தாக்கல் செய்கிற வழக்கமும், 1999-ம் ஆண்டுதான் தொடங்கியது. அதற்கு முன்புவரை பட்ஜெட்டை மாலை 5 மணிக்கு தாக்கல் செய்தனர்.

மேலும் 2016-ம் ஆண்டுவரை ரெயில்வே பட்ஜெட்டை தனியாக தாக்கல் செய்யும் வழக்கம் இருந்தது. அப்போது ரெயில்வே பட்ஜெட்டுக்கு பலத்த எதிர்பார்ப்பு இருக்கும். ஆனால் அதன்பிறகு பொது பட்ஜெட்டோடு அது இணைக்கப்பட்டு விட்டது.

இது மட்டுமின்றி, 2018-ம் ஆண்டுவரை சூட்கேசில் எடுத்துச் செல்லப்பட்ட பட்ஜெட் ஆவணங்கள், 2019-ம் ஆண்டில் இருந்து சிவப்பு நிற கோப்பில் எடுத்துச் செல்லப்பட்டு வந்தது. இதுவே 2021-ம் ஆண்டு முதல் டிஜிட்டல் ஆவணமாக (டேப்லெட்) சிவப்பு நிற கோப்புக்குள் வைத்து கொண்டு செல்லப்படுகிறது.

இந்த ஆண்டு தாக்கல் செய்யப்படுகிற பட்ஜெட், சுதந்திர இந்தியாவின் 88-வது பட்ஜெட் ஆகும். இது நிதி மந்திரி நிர்மலா சீதாராமனுக்கு 9-வது பட்ஜெட் என்பதும் குறிப்பிடத்தக்கது. தேர்தல் நெருங்கி வரும் நிலையில் இந்த பட்ஜெட்டில் தமிழ்நாட்டுக்கு புதிய அறிவிப்புகள் வெளியாகும் என அனைத்து தரப்பினரிடையே எதிர்பார்ப்பு ஏற்பட்டுள்ளது.