ரெயில் மீது கல் வீசினால் 10 ஆண்டுகள் சிறை

சென்னை,

சமீபகாலமாக சென்னை கடற்கரை - தாம்பரம், சென்னை - அரக்கோணம் மற்றும் சென்னை - கும்மிடிப்பூண்டி ஆகிய புறநகர் ரெயில் பாதைகளிலும், வந்தே பாரத் போன்ற அதிவேக ரெயில்கள் மீதும் கல் வீசும் சம்பவங்கள் அரங்கேறி வருகின்றன. பெரும்பாலும் தண்டவாளத்தின் ஓரம் விளையாடும் சிறுவர்கள் அல்லது போதை ஆசாமிகள் இதுபோன்ற செயல்களில் ஈடுபடுவதாக ரெயில்வே போலீசார் தெரிவித்துள்ளனர்.

இது ரெயிலின் ஜன்னல் கண்ணாடிகளைச் சேதப்படுத்துவது மட்டுமல்லாமல், உள்ளே இருக்கும் பயணிகளுக்கும் கடுமையான ரத்தக் காயங்களையும், சில நேரங்களில் கண் பார்வை பறிபோகும் நிலையும் ஏற்படுகிறது. கல் வீச்சு சம்பவங்கள் ரெயில் பயணிகள் மத்தியில் அச்சத்தை ஏற்படுத்தி வருகின்றன. ரெயில்வே பாதுகாப்புப் படையின் தரவுகளின்படி, கல் வீச்சு சம்பவங்கள் பெரும்பாலும் மாலை நேரங்களிலும், மக்கள் நடமாட்டம் குறைவான தண்டவாளப் பகுதிகளிலும் அதிகம் நடக்கின்றன. இரவு நேரத்திலும் ரெயில்கள் சென்று கொண்டிருக்கும் போது கல் வீசப்படுகிறது. இது பயணிகளிடையே ஒருவித பயண பயத்தை உருவாக்குகிறது. குறிப்பாக, குழந்தைகள் மற்றும் முதியவர்கள் ஜன்னல் ஓரம் அமரவே அஞ்சும் நிலை ஏற்பட்டுள்ளது.