சென்னை திருவல்லிக்கேணி போலீஸ் நிலையத்தில் ஏட்டாக பணி செய்பவர் ஸ்டாலின். இவர், நேற்று முன்தினம் இரவு திருவல்லிக்கேணி பகுதியில் ரோந்து பணியில் ஈடுபட்டார். அவர் தாசூதீன் தெரு வழியாக சென்றார். அங்குதான் பிரச்சினை வெடித்தது. அங்கு 4 பேர் உட்கார்ந்து மதுஅருந்தி கொண்டிருந்தனர். அவர்களை அங்கிருந்து கலைந்து செல்லும்படி ஸ்டாலின் கூறினார்.
ஆனால் போதையில் இருந்த அவர்கள் கலைந்து செல்லாமல் ஸ்டாலினிடம் வாக்குவாதத்தில் ஈடுபட்டனர். வாக்குவாதம் முற்றிய நிலையில், மதுஅருந்திய 4 பேரும் சேர்ந்து ஸ்டாலினை தாக்கியதாக தெரிகிறது. இதுகுறித்து அளித்த புகாரின் பேரில், திருவல்லிக்கேணி போலீசார் வழக்குப்பதிவு செய்து 4 பேரையும் கைது செய்தனர். அவர்களில் பாலமுருகன் என்பவர் தலைமைச்செயலக ஊழியர். தமிழ்செல்வன், விஜய் ஆகியோர் அரசு ஊழியர்கள் என்று கூறப்ப டுகிறது. ஜெயபால் என்பவர் கொத்தனார் வேலை செய்பவராம்.