தேனி மாவட்டத்தில் டாஸ்மாக் கடைகளுக்கு அருகே அனுமதி பெறாமல் மதுபான பார்கள் நடத்தப்பட்டன. இதுகுறித்து அரசுக்கு பல்வேறு புகார்கள் சென்றன. இதையடுத்து மதுரை டாஸ்மாக் முதுநிலை மண்டல மேலாளர் அருண் சத்யா தலைமையில் 3 குழுக்கள் அமைத்து டாஸ்மாக் அதிகாரிகள் ஆண்டிப்பட்டி, தேனி, கம்பம் ஆகிய இடங்களில் டாஸ்மாக் கடைகள் அமைந்துள்ள பகுதிகளில் இன்று திடீர் சோதனையில் ஈடுபட்டனர்.
அப்போது தேனியில் 2 டாஸ்மாக் கடைகளுக்கு அருகில் அனுமதி பெறாமல் மதுபான பார் செயல்பட்டது கண்டுபிடிக்கப்பட்டது. அந்த 2 பார்களும் உடனடியாக மூடப்பட்டு 'சீல்' வைக்கப்பட்டன. அதுபோல் ஆண்டிப்பட்டி பகுதியில் அதிகாரிகள் நடத்திய சோதனையில் 5 டாஸ்மாக் கடைகளின் அருகில் அனுமதியின்றி மதுபான பார்கள் செயல்பட்டு வந்தது தெரியவந்தது. அந்த 5 பார்களும் 'சீல்' வைக்கப்பட்டன.
கம்பம் பகுதியில் டாஸ்மாக் அதிகாரிகள் நடத்திய சோதனையின் போது 4 டாஸ்மாக் கடைகளின் அருகில் அனுமதியின்றி மதுபான பார்கள் செயல்பட்டன. அந்த 4 மதுபான பார்களும் மூடப்பட்டு 'சீல்' வைக்கப்பட்டன. மாவட்டத்தில் ஒரே நாளில் அனுமதியின்றி செயல்பட்ட 11 மதுபான பார்கள் அதிரடியாக 'சீல்' வைக்கப்பட்டன. மேலும் அனுமதியின்றி மதுபான பார்கள் நடத்திய நபர்கள் மீது வழக்கு பதிவு செய்யப்பட்டது.