தரவரிசையில் 5-வது இடத்தையும் இழக்கும் அபாயத்தில் சென்னை விமான நிலையம்

பயணிகள்

இந்திய விமான நிலைய ஆணையத்தின் கடந்த மே மாதம் புள்ளிவிவரங்களின்படி, கொல்கத்தா விமான நிலையம் 18.70 லட்சம் பயணிகளை கையாண்டுள்ளது. சென்னை விமான நிலையம் 19.04 லட்சம் பயணிகளை கையாண்டுள்ளது. இரண்டிற்கும் இடையிலான வித்தியாசம் வெறும் 34 ஆயிரம் பயணிகள்தான். விமான இயக்கங்களிலும் கொல்கத்தா வேகமாக முன்னேறி வருகிறது. மே மாதத்தில் சென்னை விமான நிலையத்தில் 13,025 விமானங்கள் இயக்கப்பட்ட நிலையில், கொல்கத்தாவில் 12,080 விமானங்கள் இயக்கப்பட்டுள்ளன. வித்தியாசம் வெறும் 945 விமானங்களாக மட்டுமே உள்ளது.

இருக்கை திறன்

ஏப்ரல் மாதத்தில் 6-வது இடத்துக்கு தள்ளப்பட்ட சென்னை, மே மாதத்தில் மீண்டும் 5-வது இடத்தை பிடித்தாலும், அதன் முன்னிலை மிகவும் குறைவாகவே உள்ளது. சென்னையின் உள்நாட்டு பயணிகள் எண்ணிக்கை கடந்த ஆண்டு மே மாதத்தில் இருந்த 14.85 லட்சத்தில் இருந்து இந்த ஆண்டு 13.93 லட்சமாக, 6.2 சதவீதம் குறைந்துள்ளது. மாறாக, கொல்கத்தாவில் உள்நாட்டு பயணிகள் எண்ணிக்கை 15.96 லட்சத்தில் இருந்து 16.59 லட்சமாக, 4 சதவீதம் உயர்ந்துள்ளது. ஐதராபாத் விமான நிலையம் சென்னையை விட மேலும் முன்னிலை பெற்றுள்ளது. மே மாதத்தில் ஐதராபாத் 25.49 லட்சம் பயணிகளை கையாண்டுள்ளது. சென்னை 19.04 லட்சம் பயணிகளை மட்டுமே கையாண்டுள்ளது. விமான இயக்கங்களிலும் ஐதராபாத் 17,306 விமானங்களை கையாண்டுள்ளது. சென்னை 13,025 விமானங்களை மட்டுமே கையாண்டுள்ளது.