பிற்படுத்தப்பட்டோர் மற்றும் சிறுபான்மையினர் நலத்துறை சார்பில் புதிய கட்டிடங்கள் - முதல்-அமைச்சர் திறந்து வைத்தார்

நபார்டு வங்கி நிதி உதவியுடன் கள்ளர் சீரமைப்பு பள்ளிகளில் பல்வேறு உட்கட்டமைப்பு வசதிகள் ஏற்படுத்தப்பட்டு வருகின்றன. அந்த வகையில், மதுரை மாவட்டம், ஆ. புதுப்பட்டி - அரசு கள்ளர் உயர்நிலைப் பள்ளியில் 2 கோடியே 57 லட்சத்து 10 ஆயிரம் ரூபாய் செலவிலும், பூசலபுரம் - அரசு கள்ளர் மேல்நிலைப் பள்ளியில் 83 லட்சத்து 60 ஆயிரம் ரூபாய் செலவிலும், தேனி மாவட்டம், வெள்ளையம்மாள்புரம் - அரசு கள்ளர் மேல்நிலைப் பள்ளியில் 1 கோடியே 10 லட்சம் ரூபாய் செலவிலும், இராஜதானி - அரசு கள்ளர் மேல்நிலைப்பள்ளியில் 2 கோடியே 1 லட்சம் ரூபாய் செலவிலும் கட்டப்பட்டுள்ள கூடுதல் வகுப்பறைகள், அறிவியல் ஆய்வகம், கணினி ஆய்வகம் மற்றும் உட்கட்டமைப்பு பணிகளை மாணவ, மாணவியர்களின் பயன்பாட்டிற்காக தமிழ்நாடு முதல்-அமைச்சர் திறந்து வைத்தார்.

புதுக்கோட்டை மாவட்டம், கிருஷ்ணாஜிபட்டினம் அரசு உயர்நிலைப் பள்ளியில் 97 லட்சத்து 87 ஆயிரம் ரூபாய் செலவில் கட்டப்பட்டுள்ள நூலகக் கட்டிடம் மற்றும் 47 லட்சத்து 23 ஆயிரம் ரூபாய் செலவில் கட்டப்பட்டுள்ள அறிவியல் ஆய்வகக் கட்டிடம்; சிங்கவனம் ஆரம்ப சுகாதார நிலையத்தில் 96 லட்சம் ரூபாய் செலவில் ஆயுஷ்பிரிவு பல்நோக்குக்கூடம், மருத்துவ உபகரணங்கள், சுகாதாரத் தொகுதி கட்டிடம் என 2 கோடியே 41 லட்சத்து 10 ஆயிரம் ரூபாய் செலவிலான கட்டிடங்களை தமிழ்நாடு முதல்-அமைச்சர் திறந்து வைத்தார்.

இந்த நிகழ்ச்சியில், சிறுபான்மையினர் நலன் மற்றும் வெளிநாடுவாழ் தமிழர் நலத்துறை அமைச்சர் எஸ்.எம்.நாசர், பிற்படுத்தப்பட்டோர் நலத்துறை அமைச்சர் சிவ.வீ.மெய்யநாதன், தலைமைச் செயலாளர் நா.முருகானந்தம், பிற்படுத்தப்பட்டோர், மிகப்பிற்படுத்தப்பட்டோர் மற்றும் சிறுபான்மையினர் நலத்துறை முதன்மைச் செயலாளர் முனைவர் சா.விஜயராஜ் குமார், மிகப்பிற்படுத்தப்பட்டோர் மற்றும் சீர்மரபினர் நல ஆணையர் வா.சம்பத், சிறுபான்மையினர் நலத்துறை ஆணையர் மு.ஆசியா மரியம் மற்றும் அரசு உயர் அலுவலர்கள் கலந்து கொண்டனர்."

இவ்வாறு அதில் தெரிவிக்கப்பட்டுள்ளது.