தொகுதி மறுவரையறை விவகாரம்: தி.மு.க., காங்கிரசை கடுமையாக சாடிய சந்திரபாபு நாயுடு

1996-ம் ஆண்டில் இருந்து காங்கிரஸ் மற்றும் அதன் கூட்டணி கட்சிகள் இந்த மசோதாவை தொடர்ந்து எதிர்த்து வந்தனர் என்றும், அவர்கள் சீர்திருத்தத்திற்கு எதிரான சக்திகள் என்றும் ஏறக்குறைய 3 தசாப்தங்களாக பெண்களுக்கான நீதியை தாமதப்படுத்தி உள்ளனர் என்றும் குற்றச்சாட்டாக கூறினார்.

பிரதமர் மோடி தலைமையிலான மத்திய அரசு, மக்களவை தொகுதிகளில் மகளிருக்கு பிரதிநிதித்துவம் அளிப்பது மற்றும் மகளிருக்கு 33 சதவீத ஒதுக்கீடு கிடைப்பதற்கான நடவடிக்கைகளை உறுதி செய்ய முனைப்புடன் செயல்பட்டு வருகிறது என்றார்.

தி.மு.க. மற்றும் காங்கிரஸ் கட்சியினர், தொகுதி மறுவரையறை விவகாரத்தில் தென்னிந்தியாவை தவறாக வழிநடத்தி செல்கின்றனர் என அவர் கடுமையாக சாடினார். மக்களவை தொகுதிகளை 50 சதவீதம் அளவுக்கு அதிகரிக்கும் முடிவால், அனைத்து மாநிலங்களும் சம அளவில் பலனடையும் என குறிப்பிட்ட அவர், தென்னிந்தியா பிரதிநிதித்துவம் இழக்கும் என்ற பயம் தேவையற்றது என்று கூறினார்.

தென்னிந்தியாவில் தற்போதுள்ள 130 இடங்கள், 195 ஆக அதிகரிக்க கூடும் என்றும் தமிழகத்தின் எம்.பி. தொகுதிகள் 39-ல் இருந்து 59 ஆகவும், ஆந்திர பிரதேச எம்.பி. தொகுதிகள் 25-ல் இருந்து 38 ஆகவும் அதிகரிக்க கூடும் என்றும் விளக்கத்துடன் கூறினார்.