குற்ற வழக்கின் விவரத்தை தெரிவிக்கவில்லையா..? விஜய்யின் வேட்புமனுக்களால் கிளம்பிய சர்ச்சை

இந்நிலையில் த.வெ.க. தலைவர் விஜய் தாக்கல் செய்த வேட்புமனுக்களால் புதிய சர்ச்சை ஒன்று கிளம்பி உள்ளது. இதன்படி விஜய், பெரம்பூர் தொகுதியில் தாக்கல் செய்த வேட்புமனுவில் குற்ற வழக்குகளின் விபரம் எதுவும் தெரிவிக்கப்படவில்லை என்று கூறப்படுகிறது. ஆனால் திருச்சி கிழக்கு தொகுதிக்கான வேட்புமனுவில் 2 வழக்குகள் இருப்பதாக குறிப்பிட்டதால் சர்ச்சை எழுந்துள்ளது.

பெரம்பூர் தொகுதி வேட்புமனுவில் தன் மீது குற்ற வழக்கு இல்லையென விஜய் தெரிவித்திருந்தநிலையில், திருச்சி கிழக்கு தொகுதிக்கான தனது 2-வது வேட்புமனுவில், மார்ச் 30ம் தேதி பெரம்பூர் பரப்புரையின்போது ஒரு வழக்கும், 2025 ஆகஸ்டில் நடந்த மதுரை மாநாடு தொடர்பான ஒரு வழக்கும் இருப்பதாக விஜய் குறிப்பிட்டுள்ளார்.

ஒரே நபர், ஒரு இடத்தில் ‘வழக்கு இல்லை’ என்றும், இன்னொரு இடத்தில் ‘வழக்கு உண்டு’ என்று தெரிவித்தால், குறிப்பிட்ட வேட்புமனு நிராகரிக்கப்படும் அபாயம் உள்ளது. ஒரு வேட்பாளர் ஒரு தொகுதிக்கு நான்கு செட் வேட்புமனுக்களை தாக்கல் செய்யலாம். விஜய் இதுவரை பெரம்பூரில் இரண்டு செட் மனுக்கள் மட்டுமே தாக்கல் செய்துள்ளார். மீதமுள்ள இரண்டு செட்களில், மதுரை வழக்கை குறிப்பிட்டு சரியான தகவல்களுடன் புதிய பிரமாணப் பத்திரத்தை தாக்கல் செய்தால் இந்த பிழையை சரிசெய்துவிடலாம் என்று கூறப்படுகிறது.