கேன்களில் பெட்ரோல்-டீசல் வழங்காததால் விவசாயிகள் கடும் பாதிப்பு: விலக்கு அளிக்க வலியுறுத்தல்

கோவை,

கோவை மாவட்டமும் விவசாயம் நிறைந்த பகுதி ஆகும். இங்குள்ள தொண்டாமுத்தூர், பொள்ளாச்சி, ஆனைமலை, நெகமம், மதுக்கரை, மேட்டுப்பாளையம், சிறுமுகை, அன்னூர் உள்ளிட்ட பகுதிகளில் நெல், சின்ன வெங்காயம், நிலக்கடலை, பாக்கு, தக்காளி, காய்கறிகள் உள்ளிட்ட ஏராளமான உணவு பொருட்கள் சாகுபடி செய்யப்பட்டு வருகிறது.

கேன்களில் பிடிக்க தடை

இந்த நிலையில் கடந்த மாதத்தில் மத்திய அரசு திடீரென்று ஒரு அறிவிப்பை வெளியிட்டது. குற்ற செயல்கள் நடப்பதை தடுக்க பெட்ரோல் விற்பனை நிலையங்களில் எரிபொருட்கள் கேன்களில் வழங்க தடை விதிக்கப்பட்டு இருப்பதாக அறிவிக்கப்பட்டது. இதனால் கோவை மாநகர பகுதிகளில் இருக்கும் பெட்ரோல் விற்பனை நிலையங்களில் யாருக்கும் கேன்களில் பெட்ரோல்-டீசல் போன்ற எரிபொருட்களை வழங்குவது இல்லை.

இருசக்கர வாகனங்கள் மற்றும் கார்களில் பெட்ரோல்-டீசல் நிரப்பப்பட்டு வருகிறது. புறநகர் பகுதியில்தான் விவசாய நிலம் இருக்கிறது. அங்கு குறிப்பிட்ட பகுதியில் மட்டுமே பெட் ரோல் விற்பனை நிலையங்கள் இருக்கும். அந்த நிலையங்களுக்கு விவசாய பயன்பாட்டுக்கு பயன்படுத்தும் எந்திரங்களை தூக்கிச்சென்று அதில் பெட்ரோல், டீசலை நிரப்பி விவசாயத்துக்கு பயன்படுத்துவது என்பது முடியாத காரியமாக இருக்கிறது.

எனவே மத்திய அரசு திடீரென்று அறிவித்து உள்ள இந்த தடை விவசாயிகளை பெரிதும் பாதித்து உள்ளது. சிறிய எந்தி ரங்களை எல்லாம் எடுத்துச்சென்று அதில் பெட்ரோல், டீசலை நிரப்ப வேண்டும் என்றால் அது முடியாது என்பதால் விவசாயிகள் பாதிக்கப்பட்டு உள்ளனர். எனவே அதில் இருந்து விலக்கு அளிக்க வேண்டும் என்று விவசாயிகள் வலியுறுத்தி உள்ளனர்.