நாமக்கல் மாவட்ட கலெக்டர் உமா வெளியிட்டுள்ள செய்திக்குறிப்பில் கூறியிருப்பதாவது:-
கொல்லிமலை தாலுகா செங்கரை, ஏகலைவா மாதிரி உண்டு உறைவிட மேல்நிலைப்பள்ளியில் உள்ள விடுதிக்கு சமையல் செய்ய பணியாளர்கள் தொகுப்பூதிய அடிப்படையில் தற்காலிகமாக நியமிக்கப்பட உள்ளனர். அதன்படி 2 சமையலர் பணியிடங்களுக்கு ஆண்களும், 3 உதவி சமையலர் பணியிடங்களுக்கு பெண்களும், ஒரு துப்புரவாளர் பணிக்கு இருபாலரும் என 6 பணியிடங்களுக்கு சமையல் கலை தெரிந்த பழங்குடியினரிடம் இருந்து விண்ணப்பங்கள் வரவேற்கப்படுகின்றன. வயது உச்ச வரம்பு 40 வயதுக்குள் இருக்க வேண்டும்.
தேர்வு செய்யப்படும் சமையலர் மற்றும் உதவி சமையலர்களுக்கு மாதம் ரூ.12 ஆயிரம் வீதமும், துப்புரவாளருக்கு ரூ.5,200-ம் தொகுப்பூதியமாக வழங்கப்படும்.
மேற்காணும் பணியிடங்களுக்கு விருப்பமுள்ள நபர்கள் தங்களது விண்ணப்பத்தை வருகிற 31-ந் தேதி மாலை 5 மணிக்குள் திட்ட அலுவலகம், பழங்குடியினர் நலம், கொல்லிமலை தாசில்தார் அலுவலகம் வளாகம் அல்லது தலைமை ஆசிரியர், ஏகலைவா மாதிரி உண்டு உறைவிட மேல்நிலைப்பள்ளி, செங்கரை, கொல்லிமலை தாலுகா என்ற முகவரிக்கு அனுப்பி வைக்க வேண்டும்.
இவ்வாறு அதில் கூறப்பட்டுள்ளது.