அதிமுகவில் தலைமை மோதல்: சபாநாயகர் எடுக்கும் முடிவு என்ன...?

சென்னை,

அ.தி.மு.க.வில் பெரும் பிளவு ஏற்பட்டுள்ளது.அந்த கட்சி எடப்பாடி பழனிசாமி தலைமையில் ஒரு அணியும், எஸ்.பி.வேலுமணி தலைமையில் ஒரு அணியும் என பிரிந்து அந்த மோதல் சட்டசபையிலும் வெடித்து இருக்கிறது. தனக்கு தான் அ.தி.மு.க. சட்டமன்ற தலைவர் பதவி என்று எடப்பாடி பழனிசாமியும், ஆனால் நான் தான் தலைவர். எனக்கு அதிகபெரும்பான்மை இருக்கிறது என்று கூறி வேலுமணியும், தனித்தனியாக தற்காலிக சபாநாயகர் கருப்பையாவி டம் மனு கொடுத்தனர்.

இந்த சூழ்நிலையில் சபாநாயகர் எந்த முடிவு எடுப்பார்? என்று அரசியல் வட்டாரத்தில் பரபரப்பாக பேசப்படுகிறது. இது குறித்து சட்ட நிபுணர்கள் கூறியிருப்பதாவது:-

தமிழக சட்டமன்றத்தில் ஒரு கட்சியின் தலைவரை தேர்ந்தெடுப்பதில் கட்சித்தலைமை மற்றும் சட்டமன்ற உறுப்பினர்களின் பெரும்பான்மை ஆகிய இரண்டுமே மிக முக்கியமானவை. பொதுவாக, தேர்தலில் வெற்றி பெற்ற பிறகு அந்தந்த கட்சிகளின் எம்.எல்.ஏ.க்கள் கூடி ஒருவரை தலைவராக தேர்ந்தெடுப்பார்கள். இவரே சட்டமன்றத்தில் அந்தக் கட்சியின் குரலாக இருப்பார்.

இந்த பதவிக்கு கட்சியின் பொதுச்செயலாளர் அல்லது உயர் மட்டக்குழு ஒருவரை பரிந்துரைக்கலாம். இறுதியாக அந்த பரிந்துரையை எம்.எல்.ஏ.க்கள் ஏற்று, முறைப்படி தீர்மானம் நிறைவேற்றி சபாநாயகருக்கு அனுப்ப வேண்டும். ஆனால் ஒரு கட்சியின் பொதுச்செயலாளர் (தலைமை) ஒரு கடிதத்தையும், பெரும்பான்மையான எம்.எல்.ஏ.க்கள் மற்றொரு கடிதத்தையும் அளித்தால், அது ஒரு தலைமை போராட்டமாக உருவெடுக்கும்.