புதிய அரசு ஊழலற்ற ஆட்சியை கொடுக்க வேண்டும்... லெஜண்ட் சரவணன் வேண்டுகோள்

விஜய்க்கு வாழ்த்து

தவெக தலைவர் விஜய்க்கு வாழ்த்துக்கள். இவ்வளவு பெரிய வெற்றியை கொடுத்திருக்காங்க இளைஞர்கள். அவர் இளைஞர்களின் எதிர்பார்ப்பை 100% நிறைவாக பண்ணனும். அது ரொம்ப முக்கியம். அந்த பொறுப்பும் அவருக்கு கண்டிப்பா தெரிஞ்சிருக்கும், இல்லன்னா இவ்வளவு பெரிய பொறுப்பை ஜனங்க அவர் கையில கொடுத்திருக்க மாட்டாங்க. அதை உணர்ந்து அவங்ககூட இருக்கிறவங்களும் செயல்படுவாங்கன்ற நம்பிக்கை இருக்கு. இது அமைஞ்சதுன்னா அது இளைஞர்களுக்கு அவங்க எடுத்த முயற்சி ஒரு சக்சஸ் ஃபுல்லா இருக்கும்.

விஜய் அரசியலுக்கு வந்ததால இப்போ திரையுலகத்துல விஜய்யோட இடத்தை நான் நிரப்புவேனா என்பது எனக்கு தெரியாது. சினிமால எனக்கு ஆர்வம் உண்டு, அதை செயல்படுத்திட்டு இருக்கேன். அது என்னன்றத காலம் தான் முடிவு பண்ணும்.

போதை கலாசாரம்

வணிகர்கள் இப்போ விக்கிரமராஜா தலைமையில் மிகச்சிறப்பா செயல்பட்டுட்டு இருக்காங்க. அவங்க இப்போ வியாபாரிகளுடைய குறைகளை உடனடியாக மத்திய அரசு, மாநில அரசுகளிடம் எடுத்து கொண்டு போய் அவங்களுக்கு தேவையான விஷயங்கள எடுத்து சொல்றாங்க. அதையும் மத்திய மாநில அரசுகள் நல்லா ஆராய்ந்து அதற்கு தேவையான உதவிகளையெல்லாம் செய்து கொடுத்துட்டு இருக்காங்க. இது வரவேற்கத்தக்கது.

இளைஞர்கள் போதை கலாச்சாரத்திற்கு அடிமையாகி இருக்காங்க. பாலியல் வன்கொடுமை நிறைய நடந்திருக்கு. போதை கலாச்சாரம் என்பது முழுமையா தவிர்க்கணும். இதுபோல வன்முறைகள், பாலியல் கொடுமைகளுக்கு உடனடியாக தண்டனை கொடுக்கணும். நிலுவையே பண்ணக்கூடாது. பத்து மாதத்திற்குள் தண்டனை கொடுக்கணும். அது தான் இதை கட்டுப்படுத்தும். அப்போது தான் இதை சரிப்படுத்த முடியும்.

விஜய்க்கு ரசிகர்கள், இளைஞர்கள் அதிகமா வாக்கு போட்டிருக்காங்க. இந்த வெற்றியை அவங்க தானே உருவாக்கி இருக்காங்க. இன்னைக்கு ஒரு புரட்சியை உருவாக்கி இருக்காங்க. அவங்க எதிர்பார்ப்பை நிறைவு பண்ணி கொடுக்கணும். விஜய்யை கண்டிப்பா சந்திப்பேன்.

இன்னைக்கு ரசிகர்கள் மாஸ் ஆக்ஷன் கதையை தான் தியேட்டருக்கு வந்து பார்க்கிறாங்க. அதே போல பண்றது தான் எங்களுக்கு நல்லா இருக்கும். அந்த மாதிரி கதாபாத்திரம் பண்ணனும்னு நான் விரும்புறேன்.

அரசியல் பிரவேசம்

எனக்கு சினிமாத்துறை பிடிக்கும். எனக்கு முதலில் தொழில்தான். மக்கள் நலன்ல எனக்கு ரொம்ப ஆர்வம் உண்டு. நான் சின்ன வயசுல இருந்தே அதை செஞ்சுட்டு தான் இருக்கேன். தொடர்ந்து செஞ்சுட்டு தான் இருப்பேன். இன்னமும் அதிகப்படுத்தி கொண்டு செஞ்சுட்டு தான் இருக்கேன். அது கால நேரம் ஒத்துழைச்சதுன்னா நான் கண்டிப்பா அரசியல்ல இறங்கி செயல்படுவேன்.

கும்பகோணத்துல 'சரவணா ஸ்டோர்' ஓபன் பண்ற ஐடியா இப்போ இல்ல. இன்னும் மத்த ரெண்டு மூணு இடங்கள்ல பிளான் பண்ணிட்டு இருக்கோம். அதுக்கு அப்புறமா கும்பகோணம் வருவோம். சூப்பர் ஸ்டார் ரஜினிகாந்த் கூட சேர்ந்து நடிக்கிறதுக்கான வாய்ப்புகள் குறித்து நான் டைரக்டர் நெல்சனிடம் சொல்லிருந்தேன். வாய்ப்பு கிடைத்தால் ஒரே ஒரு கேமியோ வேணா பண்ணுவேன். ஆனா இன்னும் உறுதியாகல.

இவ்வாறு லெஜண்ட் சரவணன் தெரிவித்தார்.