சென்னையில் உள்ள பல்லாவரம்-துரைப்பாக்கம் சாலை மற்றும் மேடவாக்கம்-சோழிங்கநல்லூர் சாலைகளில், நெடுஞ்சாலைத் துறையின் சார்பாக, மேக்ரோ வடிகால் அமைத்திடும் பணிகளை அமைச்சர்கள் எ.வ.வேலு, மா.சுப்பிரமணியன் ஆகியோர் நேற்று தொடங்கி வைத்தனர். இதுகுறித்து அமைச்சர் எ.வ.வேலு கூறியதாவது:-

இந்த பணியானது, பல்லாவரம்-துரைப்பாக்கம் சாலை மற்றும் பழைய மாமல்லபுரம் சாலையை, கடந்து பக்கிங்காம் கால்வாயில் இணைக்கும் வகையில் 2.40 கி.மீ. நீளத்திற்கு மேக்ரோ வடிகால் அமைத்திடும் வகையில் ரூ.70 கோடி மதிப்பீட்டில் பணிகள் நடைபெற உள்ளது. இதன்மூலம் மழைநீர் 8 கி.மீ. தூரம் கடக்க வேண்டியிருந்த நிலை மாறி, நேரடியாக பக்கிங்காம் கால்வாயில் சேரும் நிலை ஏற்படும். பெருவெள்ள காலங்களில் வேளச்சேரி, ராம்நகர், பெரும்பாக்கம், பள்ளிக்கரணை பகுதிகளில் ஏற்படும் மழைநீர் தேங்கும் நிலை குறையும்.