குட்கா விவகாரத்தில் தமிழக லஞ்ச ஒழிப்புத்துறையின் மூலம் விசாரணை நடத்தினால் நிச்சயமாக உண்மைகள் வெளிவராது என்பதை தெளிவாக அறிந்து கொண்ட காரணத்தினால், தி.மு.க. சார்பில், எங்களுடைய சட்டமன்ற உறுப்பினர் ஜெ.அன்பழகன் மூலமாக நாங்கள் நீதிமன்றத்தை நாடினோம். எங்களுடைய சார்பில் மூத்த வழக்கறிஞர் வில்சன் வாதாடி, இன்றைக்கு ஒரு தெளிவான தீர்ப்பு வந்திருக்கிறது.

பொதுமக்களுக்கு தீங்கு விளைவிக்கும் இந்த குட்கா விற்பனை தொடர்பான வழக்கில் உயர் அதிகாரிகளும், அமைச்சர்களும் சம்பந்தப்பட்டு இருப்பதால், தமிழக அரசின் கட்டுப்பாட்டில் இருக்கின்ற லஞ்ச ஒழிப்புத்துறை மூலமாக விசாரணை நடத்தினால் உண்மைகள் வெளிவராது என்பதால், இந்த வழக்கை சி.பி.ஐ. விசாரிக்க வேண்டும் என்று உத்தரவிட்டு இருக்கிறார்கள்.

இந்த உத்தரவை தி.மு.க. சார்பில் நான் மனதார வரவேற்கிறேன். அதேநேரத்தில், இந்த வழக்கு சி.பி.ஐ. அமைப்பால் சுதந்திரமாக விசாரிக்கப்பட்டு, உண்மை நிலவரங்கள் வெளிவர வேண்டுமென்றால், அவர்கள் அனைவரும் முறையாக தண்டிக்கப்பட வேண்டுமென்றால், இந்த வழக்கில் குற்றம் சாட்டப்பட்டு இருக்கின்ற அமைச்சர் விஜயபாஸ்கர், தமிழக காவல்துறை டி.ஜி.பி. டி.கே.ராஜேந்திரன் ஆகியோர் உடனடியாக பதவி விலக வேண்டும்.

அதுமட்டுமல்ல, காவல்துறை டி.ஜி.பி.க்கும் இந்த வழக்கில் தொடர்புள்ளதாக வருமான வரித்துறை அறிக்கையில் தெளிவாக குறிப்பிடப்பட்டு இருந்த நிலையில், அவர் பணியிலிருந்து ஓய்வு பெற்றார். ஆனால், அவருக்கு காலநீட்டிப்பு கொடுத்ததோடு, பதவி உயர்வும் கொடுத்து, அவரை டி.ஜி.பி.யாக நியமித்து இருப்பதே முதல்- அமைச்சர் எடப்பாடி பழனிசாமி தான். நியாயமாக, எடப்பாடி பழனிசாமி, சி.பி.ஐ. விசாரணைக்கு உத்தரவிடப்பட்டுள்ள நிலையில், அவரும் தனது பதவியை ராஜினாமா செய்ய வேண்டும்.

தி.மு.க. ஆட்சிக்கு வந்தவுடன் முதலில் இதையெல்லாம் கண்டறிந்து, உரிய நடவடிக்கை எடுப்போம். அதுமட்டுமல்ல, தி.மு.க. ஆட்சி அமைந்ததும் லோக் ஆயுக்தா சட்டத்தையும் கொண்டு வரவிருக்கிறோம். எனவே, குட்கா விவகாரத்தில் தொடர்புடைய அனைவரையும் கைது செய்து, சிறையில் அடைப்போம்.

போராடிக் கொண்டிருக் கும் ஆசிரியர்கள், எங்களை நேரில் வந்து சந்தித்து, அரசின் சார்பில் ஒரு உறுதிமொழி கொடுத்தால் போதும். ஏற்கனவே, 2016-ல் ஜெயலலிதா 110 விதியின் கீழ் உறுதிமொழி கொடுத்திருக்கிறார். அது காப்பாற்றப்படாமல் கிடப்பில் போடப்பட்டு இருக்கிறது. இருந்தாலும், அதேபோன்ற உறுதிமொழியை இப்போதுள்ள ஆட்சியாளர்களும், துறையின் அமைச்சரும் வந்து சொன்னால் போதும், நாங்கள் போராட்டத்தை கைவிடுவோம், என்று சொல்லியுள்ளனர். எனவே, அவர்களது கோரிக்கையை நிறைவேற்ற வேண்டும் என நான் தொலைபேசியில் பேச தொடர்பு கொண்டபோது அமைச்சர் கிடைக்கவில்லை என்றாலும், ஊடகங்கள் மூலமாக நான் அமைச்சர் செங்கோட்டையனை மிகுந்த பணிவோடு கேட்டுக்கொள்கிறேன்.

இவ்வாறு அவர் கூறினார்.