சென்னை,
கொரோனா காலகட்டத்தில் திரையரங்குகள் உலகம் முழுவதும் மூடப்பட்டதால் ஓடிடி தளங்களில் படம், வெப் சீரிஸ் பார்ப்பவர்களின் எண்ணிக்கை அதிகரித்தது. புதிய ஓடிடி தளங்களில் வருபிளிக்ஸ் தளம் இருந்து வருகிறது. நெட்பிளிக்ஸ் தளத்தில் சந்தாதாரர்களின் எண்ணிக்கை 20 கோடியை கடந்துள்ளது. நெட்பிளிக்சுக்கு அடுத்த இடத்தில் 17 கோடிக்கும் அதிகமான சந்தாதாரர்களைப் பெற்று இரண்டாம் இடத்தில் அமேசான் பிரைம் உள்ளது.
இந்த நிலையில் தற்போது நெட்பிளிக்ஸ் ஓடிடி தளம் தனது மாதாந்திர கட்டணங்களை அதிரடியாக குறைத்துள்ளது. அந்த வகையில் இதுவரை ரூ.200 இருந்து வந்த மொபைல் பிளான் கட்டணும் தற்போது ரூ. 149 என்று குறைக்கப்பட்டுள்ளது.
இந்த பிளானை ஒரு நேரத்தில் ஒரு நபர் மட்டும் மொபைல் அல்லது டேப்லட்டில் பயன்படுத்த இயலும். அதே போல மாதம் ரூ.499 கட்டணம் வசூலிக்கப்பட்ட பேசிக் பிளான் தற்போது ரூ.199 ஆக குறைக்கப்பட்டுள்ளது. மாதம் ரூ.649 ஆக இருந்த ஸ்டாண்டர்ட் பிளான் ரூ.499 ஆகவும், ரூ.799 ஆக இருந்த பிரீமியம் பிளான் ரூ.649 ஆகவும் குறைக்கப்பட்டுள்ளது.
நெட்பிளிக்ஸின் இந்த அதிரடி கட்டணக் குறைப்பு சினிமா ரசிகர்களுக்கு மகிழ்ச்சியை ஏற்படுத்தியுள்ளது.
அதே நேரம் இரண்டாவது இடத்தில் இருக்ககும் அமேசான் பிரைம் கட்டணத்தை அதிகரித்து உள்ளது. இந்தியாவில் பிரைம் மெம்பர்ஷிப்பின் விலை 50 சதவீதம் வரை அதிகரிக்க அமேசான் திட்டமிட்டுள்ளது.
நாளை தொடங்கும் வருடாந்திர பிரைம் மெம்பர்ஷிப் திட்டத்திற்குப் பயனர்கள் ரூ.1,499 செலுத்த வேண்டும். தற்போது 999 ரூபாய்க்குக் கிடைக்கும் இந்த திட்டம், 500 ரூபாய் அல்லது 50 சதவீதத்திற்கு மேல் உயரும்.
அமேசான் பிரைமில் தற்போது ரூ.129 விலையில் இருக்கும் மாதாந்திர திட்டம் ரூ.50 அதிகரித்து ரூ.179-ஆக இருக்கும்.
அமேசான் பிரைமுக்கான காலாண்டுத் திட்டமானது ரூ.329-ல் இருந்து ரூ.459-க்கு 39 சதவீதத்திற்கும் மேலாக விலை உயர்வைக் காணும். இந்த விலை உயர்வு, பயனர்களுக்குக் கூடுதல் பலன்களை அளிக்காது என்பது குறிப்பிடத்தக்கது. இந்த மெம்பர்ஷிப், பிரைம் வீடியோ, பிரைம் மியூசிக் மற்றும் பிரைம் ரீடிங்கிற்கான அணுகலைப் பெறும்.