தமிழ்நாட்டில் மக்கள்தொகைக் கணக்கெடுப்பு களப் பணிகள் நாளை முதல் தொடக்கம்

நவீன டிஜிட்டல் தொழில்நுட்பம்

விரிவான, துல்லியமான கணக்கெடுப்பை உறுதி செய்வதற்காக, இந்தியாவில் முதல் முறையாக முழுவதும் நவீன டிஜிட்டல் தொழில்நுட்பம் பயன்படுத்தப்படுகிறது. இந்த முறையில் வீடு வீடாக சென்று கணக்கெடுக்கும் பணி மேற்கொள்ளப்படுகிறது. கள பணியின்போது, ​​கணக்கெடுப்பாளர்கள் தரவுகளை டிஜிட்டல் முறையில் பதிவு செய்ய ஒரு பிரத்யேக மொபைல் செயலியை பயன்படுத்துவார்கள். இது விரைவான செயலாக்கம், அதிக துல்லியம், தடையற்ற கணக்கெடுப்பு அனுபவம் ஆகியவற்றை வழங்கும்.

1948-ம் ஆண்டின் மக்கள்தொகை கணக்கெடுப்பு சட்டத்தின்படி, சேகரிக்கப்பட்ட அனைத்து தகவல்களும் சட்டப்பூர்வமாக பாதுகாக்கப்பட்டு, முற்றிலும் ரகசியமாக வைக்கப்பட்டு, புள்ளிவிவர பகுப்பாய்வு, பொதுக்கொள்கை உருவாக்கம் ஆகியவற்றிற்காக மட்டுமே பிரத்தியேகமாக பயன்படுத்தப்படும்.

சுய-கணக்கெடுப்பு வசதி

கள செயல்பாடுகளுக்கு முன்னதாக, 2027 மக்கள்தொகை கணக்கெடுப்பிற்காக புதிதாக அறிமுகப்படுத்தப்பட்ட சுய-கணக்கெடுப்பு வசதியானது, தமிழ்நாட்டு மக்களிடமிருந்து பெரிய அளவில் வரவேற்பைப் பெற்றுள்ளது. 17 ஜூலை 2026 முதல் 31 ஜூலை 2026 வரை, 10 லட்சத்திற்கும் மேற்பட்ட குடும்பத்தினர் அதிகாரப்பூர்வ இணையதளம் (se.census.gov.in) வழியாகத் தங்கள் விவரங்களை சமர்ப்பித்துள்ளனர்.

அடையாள எண்

சுய கணக்கெடுப்பை நிறைவு செய்துள்ள அவர்கள், வீட்டு பட்டியல் தயாரிப்பு பணியை எளிதாக்குவதற்காக, வருகை தரும் கணக்கெடுப்பாளரிடம் பகிர்ந்துகொள்ள, தாங்கள் உருவாக்கிய சுய கணக்கெடுப்பு அடையாள எண்ணை உடனடியாக கைவசம் வைத்திருக்குமாறு கேட்டுக்கொள்ளப்படுகிறார்கள். சுய கணக்கெடுப்பு வசதியை பயன்படுத்தாத குடும்பத்தினர் உட்பட அனைத்து குடும்பங்களும், வீட்டுப்பட்டியல், வீட்டுவசதி கணக்கெடுப்புக் களப்பணிகளின் போது உள்ளடக்கப்படுவார்கள்.

இந்த பணியின் போது, களப்பணியாளர்களுக்கு முழு ஆதரவை வழங்கி, இந்த முக்கியமான தேசிய பணியை வெற்றிகரமாக நடத்துவதற்கு பங்களிக்குமாறு மக்கள் கேட்டுக்கொள்ளப்படுகிறார்கள்.

இவ்வாறு அதில் தெரிவிக்கப்பட்டுள்ளது.