போர் பதற்றத்தால் பற்றாக்குறை: வீட்டில் கியாஸ் சிலிண்டரை சிக்கனமாக பயன்படுத்தலாமே!

அதற்கான சில டிப்ஸ்களை தொடர்ந்து பார்ப்போம்.

* வீட்டில் தண்ணீர் கொதிக்க வைக்க அல்லது பால் காய்ச்ச மின்சார அடுப்பை பயன்படுத்தலாம்.

* குடிப்பதற்கு தேவையான வெந்நீரை ஒரே முறை சூடுபடுத்தி பிளாஸ்க்கில் ஊற்றி வைத்துக் கொள்ளுங்கள். ஒவ்வொரு முறையும் அடுப்பை பற்ற வைப்பதை தவிர்க்கலாம்.

* அடுப்பைப் பற்ற வைப்பதற்கு முன்பே காய்கறிகளை நறுக்குவது, மசாலாக்களைத் தயார் செய்வது என அனைத்தையும் முடித்துவிட வேண்டும். அடுப்பை எரியவிட்டுவிட்டு காய்கறி நறுக்குவது கியாஸ் செலவை அதிகரிக்கும்.

பிரஷர் குக்கரில் சமைக்கவும்

* பிரிட்ஜில் இருந்து எடுக்கும் பொருட்களை நேரடியாக அடுப்பில் வைக்க வேண்டாம். அவை வெப்ப சமநிலைக்கு வந்த பிறகு சூடுபடுத்தினால் குறைந்த அளவே கியாஸ் செலவாகும்.

* முடிந்தவரை பெரும்பாலான உணவுகளை பிரஷர் குக்கரில் சமைக்கவும். இது சாதாரண பாத்திரங்களை விட 20 சதவீதம் முதல் 50 சதவீதம் வரை கியாசை மிச்சப்படுத்தும்.

* பர்னரின் அளவை விட பெரிய பாத்திரங்களை பயன்படுத்துங்கள். சுடர் பாத்திரத்தின் ஓரங்களைத் தாண்டி வெளியே வந்தால் வெப்பம் வீணாகிறது என்று அர்த்தம்.

* எப்போதும் பாத்திரங்களை மூடிவைத்து சமைக்கவும். இதனால் ஆவி வெளியேறாமல் உணவு விரைவாக வேகும்.

அதிக அளவு கேஸ் வீணாவதை தடுக்க வேண்டும்

* உங்கள் அடுப்பின் பர்னர் நீல நிறச் சுடருடன் எரிகிறதா என்பதை உறுதிப்படுத்துங்கள். மஞ்சள் நிறத்தில் எரிந்தால் பர்னரில் அடைப்பு உள்ளது என்று அர்த்தம். இது அதிக அளவு கியாசை உறிஞ்சும்.

* தண்ணீர் கொதிக்க ஆரம்பித்தவுடன் தீயைக் குறைத்துவிடுங்கள். அதிக தீயில் வைப்பதால் உணவு சீக்கிரம் வேகாது, மாறாக தண்ணீர் மட்டுமே ஆவியாகும்.

* அரிசி மற்றும் பருப்பு வகைகளைச் சமைப்பதற்கு 30 நிமிடங்களுக்கு முன்பே ஊற வைத்தால், அவை மிக விரைவாக வெந்துவிடும்.

* சமைக்கும்போது அளவுக்கு அதிகமாகத் தண்ணீர் ஊற்ற வேண்டாம். அதிக தண்ணீரைச் சுண்ட வைக்க அதிக நேரம் அடுப்பு எரிய வேண்டியிருக்கும்.

* குடும்பத்தினர் அனைவரும் ஒரே நேரத்தில் உணவருந்துவது சிறந்தது. தனித்தனியாக சாப்பிடும்போது ஒவ்வொரு முறை உணவை சூடுபடுத்துவதால் அதிக கியாஸ் வீணாகிறது.

* அடுப்பில் வைக்கும் பாத்திரத்தின் வெளிப்பகுதி ஈரமில்லாமல் துடைத்துவிட்டு வைக்கவும். ஈரப்பதம் இருந்தால், அதை உலர்த்தவே சிறிய அளவு கியாஸ் வீணாகும்.

* சமைத்து முடித்தவுடன் மறக்காமல் ரெகுலேட்டரை அணைத்து விடுங்கள். இது மிகச்சிறிய அளவிலான கியாஸ் கசிவை தடுப்பதுடன் பாதுகாப்பையும் உறுதி செய்யும்.

* முட்டை வேகவைக்கவோ அல்லது காய்கறிகளை ஆவியில் வேகவைக்கவோ பாத்திரம் நிறையத் தண்ணீர் ஊற்ற வேண்டாம். காய் மூழ்கும் அளவிற்கு மட்டும் தண்ணீர் இருந்தால் போதும்.

மின்சார அடுப்பு

* குக்கரில் சாதம் வைக்கும்போதே, அதனுள்ளேயே ஒரு சிறிய பாத்திரத்தில் பருப்பு அல்லது காய்கறிகளையும் வைத்து ஒரே விசிலில் அனைத்தையும் வேகவைக்கலாம்.

* காய்கறிகள் முக்கால்வாசி வெந்ததும் அடுப்பை அணைத்துவிட்டு மூடி வைத்துவிடுங்கள். அந்தப் பாத்திரத்தில் இருக்கும் வெப்பத்திலேயே மீதி கால்வாசி வெந்துவிடும். இது தினமும் 5-10 நிமிட கியாஸ் பயன்பாட்டை மிச்சப்படுத்தும்.

* டீ, காபி அல்லது குடிதண்ணீர் சூடுபடுத்த கியாஸ் பயன்படுத்துவதை முற்றிலுமாகத் தவிர்த்துவிட்டு மின்சார அடுப்பை பயன்படுத்துங்கள்.

* ஒரு கப் சுடுதண்ணீர் தேவைப்பட்டால் கூட கியாஸ் அடுப்பை தேடாமல் 'கெட்டில்'-ஐ பயன்படுத்துங்கள். இது கியாசை விட வேகமானது.