தூத்துக்குடி வி.இ.ரோட்டில் தமிழ்நாடு மெர்க்கன்டைல் வங்கியின் தலைமை அலுவலகம் அமைந்து உள்ளது. இந்த அலுவலகத்துக்கு நேற்று முன்தினம் காலை 10.30 மணி அளவில் மதுரை, திருச்சி, சேலம், கோவை மாவட்டங்களை சேர்ந்த வருமான வரித்துறை நுண்ணறிவு பிரிவு அதிகாரிகள் வந்தனர். அவர்கள் வங்கி தலைமை அலுவலகத்தின் 2 கட்டிடங்களிலும் உள்ள முக்கிய அதிகாரிகளிடம் தீவிர விசாரணை மேற்கொண்டு, சோதனை செய்தனர்.

இதற்கிடையே, வங்கி தாக்கல் செய்த நிதிநிலை அறிக்கையில், சில பரிவர்த்தனையின் மீது சந்தேகம் ஏற்பட்டதால், வருமானவரித்துறை சட்டம் 285 பி.ஏ-ன் கீழ் வருமான வரித்துறை அதிகாரிகள் சோதனை செய்ததாக கூறப்பட்டது. அதே நேரத்தில் அமைச்சர் செந்தில்பாலாஜியின் நிதிபரிவர்த்தனை தொடர்பாக வருமான வரித்துறை அதிகாரிகள் சோதனை நடத்தியதாகவும் தகவல்கள் வெளியானது.