ஒரே நேரத்தில் விடைத்தாள் திருத்துவதுடன் தேர்தல் பணி: கூடுதல் சுமையால் தவிக்கும் ஆசிரியர்கள்

2-வது கட்ட பயிற்சி வகுப்பானது சில மாவட்டங்களில் வருகிற சனிக்கிழமையும், சில மாவட்டங்களில் ஞாயிற்றுக்கிழமையும் நடைபெற உள்ளது. இதற்கான அதிகாரப்பூர்வ அறிவிப்பினை தேர்தல் ஆணையம் அறிவிக்கவில்லை என்றாலும் அதற்கான ஏற்பாடுகளை செய்து வருகிறது.

தேர்தல் பணிகளை பொறுத்தவரை அரசு ஊழியர்களை விட ஆசிரியர்கள் தான் அதிக அளவில் ஈடுபடுத்தப்படுவது வழக்கம். தமிழகத்தில் தற்போது பிளஸ்-2 அரசு பொதுத்தேர்வு விடைத்தாள்களை திருத்தும் பணியானது கடந்த 6-ந்தேதி தொடங்கி நடைபெற்று வருகிறது. வருகிற 21-ந்தேதி வரை இந்த பணி தொடர உள்ளது.

பத்தாம் வகுப்பு (எஸ்.எஸ்.எல்.சி.) பொதுத்தேர்வு நேற்று முன்தினம் முடிவடைந்து விட்டதால், அந்த விடைத்தாள்களை திருத்தும் பணியும் வருகிற 10-ந்தேதி தொடங்கப்பட இருக்கிறது. வருகிற ஞாயிற்றுக்கிழமை தேர்தல் பணிக்கான பயிற்சி வகுப்பு நடத்தப்பட்டால் விடைத்தாள் திருத்தும் பணியில் ஈடுபடும் ஆசிரியர்கள் ஒரு நாள் கூட விடுமுறை இன்றி தொடர்ந்து பணியாற்ற வேண்டிய கட்டாயத்திற்கு தள்ளப்பட்டு உள்ளனர்.