காதலித்து கழற்றி விட நினைத்த மாணவியை கழுத்தை நெரித்து கொல்ல முயன்ற கொடூர காதலன்

திருச்சி,

திருச்சி ஐ.ஜி. பங்களா முன்பு நேற்று இரவு ஒரு காதல் ஜோடி வெகு நேரமாக அமர்ந்து பேசிக் கொண்டிருந்தனர். பின்னர் திடீரென அவர்களுக்கு இடையே வாக்குவாதம் ஏற்பட்டது. இதில் ஆத்திரமடைந்த காதலன் அந்த பெண்ணின் கழுத்தை துப்பட்டாவால் இறுக்கினார். எதிர்பாராத தாக்குதலால் நிலைகுலைந்த அந்தப் பெண் அங்கு மயங்கி விழுந்தார்.

அதன் பின்னரும் ஆத்திரம் அடங்காத அந்த வாலிபர் அங்கு கடந்த கல்லை எடுத்து அவரது தலையில் ஓங்கி அடித்தார். அவர்களின் சண்டையை நேரில் பார்த்துகொண்டிருந்த அக்கம்பக்கத்தினர், கல்லூரி மாணவர்கள் இளைஞர்கள் அங்கு ஓடோடி வந்தனர். மேலும் ஐ.ஜி. பங்களாவில் பாதுகாப்பு பணியில் இருந்த போலீசாரும் அங்கு வந்தனர். கல்லால் தாக்கியதில் பலத்த காயங்களுடன் மயங்கிய நிலையில் கிடந்த அந்த பெண்ணை மீட்ட போலீசார் உடனே ஆம்பு லன்சை வரவழைத்து அவரை அருகில் உள்ள ஒரு தனியார் மருத்துவமனைக்கு அனுப்பி வைத்தனர். மேலும் அவரை தாக்கிய கொடூரமாக காதலனை கே.கே.நகர் போலீசில் ஒப்படைத்தனர். பின்னர் போலீசார் வழக்கு பதிவு செய்து அந்த வாலிபரை கைது செய்தனர். பலத்த காயமடைந்த மாணவி மீட்கப்பட்டு, தற்போது மருத்துவமனையின் தீவிர சிகிச்சைப் பிரிவில் அனுமதிக்கப்பட்டுச் சிகிச்சை பெற்று வருகிறார்.