தூத்துக்குடி,
திருநெல்வேலி, தூத்துக்குடி, கன்னியாகுமரி, தென்காசி மாவட்டங்களில் கடந்த 17,18ம் தேதிகளில் அதிகனமழை பெய்தது. அதிகனமழையால் தாமிரபரணி ஆற்றில் வரலாறு காணாத வெள்ளப்பெருக்கு ஏற்பட்டது.
இதனால், திருநெல்வேலி, தூத்துக்குடி நகர், கிராமப்புறங்களில் மழை வெள்ள நீர் புகுந்தது. குறிப்பாக, தூத்துக்குடி மாவட்டம் ஏரல், ஆத்தூர் பகுதிகளில் பெரும் பாதிப்பு ஏற்பட்டது.
தற்போது, மழை நின்று வெள்ளநீர் வடிந்து வருகிறது. ஆனால், பல பகுதிகளில் இன்னும் வெள்ளநீர் சூழ்ந்துள்ளது. இதனால், மக்களின் இயல்புவாழ்க்கை பாதிக்கப்பட்டுள்ளது. அதேவேளை, மழை, வெள்ளத்தால் பாதிக்கப்பட்ட இடங்களில் சீரமைப்பு பணிகள், நீர் வடிகால் பணிகள் துரிதமாக நடைபெற்று வருகின்றன. அதேவேளை, முதல்-அமைச்சர் மு.க.ஸ்டாலின் நேற்று முன் தினம் கனமழை வெள்ளத்தால் பாதிக்கப்பட்ட திருநெல்வேலி, தூத்துக்குடிக்கு சென்று பாதிப்புகளை நேரில் பார்வையிட்டார்.
இந்நிலையில், தமிழ்நாடு தலைமை செயலாளர் சிவ்தாஸ் மீனா இன்று தூத்துக்குடி சென்றுள்ளார். தூத்துக்குடியில் மழை,வெள்ளத்தால் பாதிக்கப்பட்ட இடங்களில் நடைபெறும் சீரமைப்பு பணிகள், நீர் வடிகால் பணிகளை சிவ்தாஸ் மீனா நேரில் பார்வையிட்டு வருகிறார்.