அண்ணாமலை அரசியல் வருகை த.வெ.க. வளர்ச்சியை பாதிக்குமா..?

அண்ணாமலைக்கு பின்னடைவு

ஆனால், சமீபத்தில் நடந்த சட்டசபை தேர்தலை கருத்தில் கொண்டு, ஒரு ஆண்டுக்கு முன்பே மீண்டும் அ.தி.மு.க.வுடன் கூட்டணி பேச்சு வார்த்தையை பா.ஜ.க. தொடங்கியபோது, அ.தி.மு.க. பொதுச் செயலாளர் எடப்பாடி பழனிசாமி வைத்த ஒரே கோரிக்கை, அண்ணாமலையை மாநில தலைவர் பதவியில் இருந்து நீக்க வேண்டும் என்பதுதான்.

அந்தக் கோரிக்கை நிறைவேற்றப்பட்டு, தலைவர் பதவியில் இருந்து அண்ணாமலை நீக்கப்பட்ட பிறகே பா.ஜ.க.வுடன் கூட்டணி அமைக்க அ.தி.மு.க. சம்மதித்தது. பா.ஜ.க.வில் அண்ணாமலையும் பின்னுக்கு தள்ளப்பட்டார்.

முதல் தேர்தலில் த.வெ.க.வின் முத்திரை

மற்றொரு பக்கம் நடிகர் விஜய்யின் தமிழக வெற்றிக் கழகமும் முதல் தேர்தலை எதிர்கொள்ள தயாராகி வந்தது. மக்களை சந்திக்க விஜய் சென்ற இடங்களில் எல்லாம், கூட்டம் ஆர்ப்பரித்தது. இது ஆளுங்கட்சியாக இருந்த தி.மு.க.வுக்கும், ஆண்ட கட்சியான அ.தி.மு.க.வுக்கும் கிலியை ஏற்படுத்தின.

கடைசியில் தேர்தல் முடிவும் இரு திராவிட கட்சிகளுக்கும் பயத்தை ஏற்படுத்தியதுபோல் அமைந்துவிட்டது. முதல் தேர்தலிலேயே முத்திரை பதித்து, த.வெ.க.வும் கூட்டணி பலத்துடன் ஆட்சி அரியணையில் ஏறிவிட்டது.

அண்ணாமலை புதிய இயக்கம் தொடக்கம்

தற்போது, புதிய முதல்-அமைச்சராக விஜய் பதவியேற்று ஒரு மாதம் நிறைவடையப் போகிறது. இந்த ஒரு மாதத்தில், 717 மதுக்கடைகள் மூடப்பட்டுள்ளன. 500 யூனிட் வரை மின்சாரம் பயன்படுத்தும் வீடுகளுக்கு 2 மாதம் 200 யூனிட் இலவசம் என்று அறிவிக்கப்பட்டுள்ளது. ரூ.50 ஆயிரம் வரையிலான சிறு, குறு விவசாயிகளின் கடன்களும் தள்ளுபடி செய்யப்பட்டுள்ளது. லஞ்ச லாவண்யம் அறவே இருக்காது என்றும் தெரிவிக்கப்பட்டுள்ளது.

அரசியல் கட்சிகளின் பார்வையும், தமிழக மக்களின் பார்வையும் த.வெ.க. அரசின் செயல்பாடுகளை உற்று நோக்கிக் கொண்டிருக்கும் நேரத்தில், பா.ஜ.க.வை விட்டு விலகி, அண்ணாமலையும் புதிய இயக்கத்தை தொடங்கியிருக்கிறார்.

விஜய் - அண்ணாமலை இடையே போட்டி

இளைஞர்களை மையப்படுத்தி தொடங்கப்பட்டுள்ள இந்த இயக்கத்தில், இதுவரை 13 லட்சத்துக்கும் அதிகமானோர் இணைந்துள்ளனர். அந்த அளவுக்கு அண்ணாமலையின் இயக்கம் எழுச்சி பெற்றுள்ளது. இதுவும் இயக்கத்தில் இணையும் இளைஞர்களுக்கு பயிற்சி அளித்து, அதில் தேர்ச்சி பெறுபவர்களுக்கே பொறுப்பு வழங்கப்படும் என்று அண்ணாமலை தெரிவித்து இருப்பது தமிழக அரசியலில் புதிதாக பார்க்கப்படுகிறது.

அண்ணாமலையின் அரசியல் வருகை த.வெ.க.வின் வளர்ச்சியை பாதிக்குமா? என்ற கேள்வியும் எழுந்துள்ளது. அடுத்த பொதுத் தேர்தலை இலக்காக கொண்டு செயல்படுவதாக அண்ணாமலை கூறியிருப்பதால், அந்தத் தேர்தலில் விஜய் - அண்ணாமலை இடையேதான் கடும் போட்டி இருக்கும் என்று எதிர்பார்க்கப்படுகிறது. இதை திராவிட கட்சிகளான தி.மு.க., அ.தி.மு.க. எப்படி எதிர்கொள்ளப்போகின்றன? என்ற கேள்வியும் இப்போதே எழுந்துள்ளது.

இனி, த.வெ.க. ஆட்சியின் ஒவ்வொரு நகர்வுகளும், அண்ணாமலையின் அடுத்த கட்ட முயற்சிகளுமே யார் முன்னுக்கு வருவார்கள்? என்பதை தீர்மானிக்கும்.