கோவை,
நாட்டின் 80-வது சுதந்திர தினத்தை முன்னிட்டு, கவுண்டம்பாளையம் சட்டமன்ற உறுப்பினர் அலுவலகத்தில் தேசியக் கொடியை ஏற்றி வைத்து, தியாகிகளுக்கு மரியாதை செலுத்தி, தொகுதி மக்களுக்கு சுதந்திர தின வாழ்த்துகளை கவுண்டம்பாளையம் சட்டமன்ற உறுப்பினர் கனிமொழி சந்தோஷ் தெரிவித்தார்.
அப்போது அவர் பேசியதாவது:
“பல கோடி தியாகிகளின் தியாகத்தாலும், அர்ப்பணிப்பாலும் நாம் இன்று சுதந்திரக் காற்றை சுவாசித்து வருகிறோம். அண்ணல் காந்தியடிகளின் அகிம்சை, நேதாஜியின் வீரம், பகத் சிங்கின் துணிச்சல் உள்ளிட்ட எண்ணற்ற தலைவர்களின் போராட்டங்களை இந்நாளில் நெஞ்சார நினைவு கூர வேண்டும்.
தமிழக மண்ணில் இருந்து நாட்டின் விடுதலைக்காகப் போராடிய மாவீரன் பூலித்தேவன், வீரபாண்டிய கட்டபொம்மன், மருது சகோதரர்கள், வீரமங்கை வேலுநாச்சியார், கப்பலோட்டிய தமிழன் வ.உ.சிதம்பரனார், மகாகவி பாரதியார், திருப்பூர் குமரன் உள்ளிட்ட விடுதலைப் போராட்டத் தியாகிகளையும் நாம் போற்றி வணங்க வேண்டும்.
தியாகிகள் நமக்கு சுதந்திரத்தைப் பெற்றுத் தந்துள்ளனர். அந்தச் சுதந்திரத்தைப் பாதுகாத்து, நாட்டையும் சமூகத்தையும் முன்னேற்ற வேண்டிய பொறுப்பு நம் ஒவ்வொருவருக்கும் உள்ளது.
கவுண்டம்பாளையம் தொகுதி மக்களின் நம்பிக்கைக்குரிய பிரதிநிதியாக, சாதி, மதம், கட்சி என எந்தப் பாகுபாடுமின்றி, ஒவ்வொரு குடிமகனின் குறைகளையும் கேட்டு, அவர்களின் கோரிக்கைகளுக்குத் தீர்வு காண்பதே எனது முக்கியக் கடமை.
நமது அலுவலகத்தை நாடி தினந்தோறும் ஏராளமான மக்கள் தங்களது கோரிக்கைகளுடன் வருகின்றனர். குறிப்பாக ஏழை, எளிய மக்கள், உழைப்பாளர்கள், விவசாயிகள், நெசவாளர்கள் மற்றும் விளிம்புநிலை மக்களின் குரலாக தொடர்ந்து செயல்படுவோம்.
அரசின் நலத்திட்டங்கள் அனைவருக்கும் நேர்மையாகச் சென்றடைவதை உறுதி செய்வதும், மக்களின் அடிப்படைத் தேவைகளுக்குத் தீர்வு காண்பதும் நாம் நாட்டிற்கு ஆற்றும் உண்மையான சேவையாகும்.
‘மக்களே நமது முதலாளி; நாம் அவர்களின் பணியாளர்கள்’ என்ற எண்ணத்துடன், கழக நிர்வாகிகளும் தொண்டர்களும் மக்கள் சேவையை தங்களது முதன்மை லட்சியமாகக் கொண்டு செயல்பட வேண்டும்.
இந்த தேசியக் கொடியின் கீழ், கவுண்டம்பாளையம் தொகுதியை தமிழகத்திலேயே ஒரு முன்மாதிரித் தொகுதியாக மாற்றுவதற்கு ஒன்றிணைந்து உழைப்போம் என உறுதியேற்போம்.
தமிழ் உணர்வோடும், தேசப்பற்றோடும், மக்கள் நலனையே முன்னிறுத்தி தொடர்ந்து பயணிப்போம்.
இவ்வாறு அவர் கூறினார்.