இந்த நிலையில், தலைநகர் காபூலில் இன்று நடந்த கார் வெடிகுண்டு தாக்குதல் ஒன்றில் பெண்கள், குழந்தைகள் மற்றும் வயது முதிர்ந்தவர்கள் என 9 பேர் உயிரிழந்து உள்ளனர். இதனை தொடர்ந்து சம்பவ பகுதியில் இருந்த மக்கள் அலறியடித்தபடி அங்குமிங்கும் ஓடினர்.

இந்த சம்பவத்தில் அந்நாட்டு எம்.பி.யான கான் முகமது வர்தாக் என்பவர் உள்பட 15 பேர் காயம் அடைந்து உள்ளனர். இந்த தாக்குதல் சம்பவம் பற்றி ஆப்கானிஸ்தான் நாட்டு உள்துறை அமைச்சக செய்தி தொடர்பு அதிகாரி தாரிக் ஆரியன் கூறும்பொழுது, இன்று நடந்த தாக்குதலில் உயிரிழப்பு எண்ணிக்கை அதிகரிக்க கூடும் என கூறியுள்ளார்.

சமீப காலங்களாக காபூல் நகரில் நடந்து வரும் தாக்குதல்களுக்கு ஐ.எஸ்.ஐ.எல். என்ற ஆயுத குழு பொறுப்பு ஏற்று கொண்டுள்ளது. எனினும் இந்த தாக்குதலுக்கு எந்தவொரு பயங்கரவாத அமைப்பும் பொறுப்பேற்கவில்லை.