இணையத்தில் இந்த சம்பவம் வைரலாக பரவிய நிலையில், அந்த சிறுமிக்கு ஆதரவு தெரிவித்து இங்கிலாந்து கால்பந்து ரசிகர்கள் பலர் கருத்து பதிவிட தொடங்கினர். இதனால் இணையத்தில் கருத்து மோதல்கள் உருவானது. இதற்கிடையில் அந்த சிறுமிக்கு ஆதரவு தெரிவிக்கும் வகையில் இங்கிலாந்தைச் சேர்ந்த ஜோயல் ஹுயுக்ஸ் என்பவர் 50,000 பவுண்டுகளை இலக்காக வைத்து ஆன்லைனில் நிதி திரட்டி ஆரம்பித்தார்.

ஆனால் அவர் எதிர்பார்த்ததை விட அந்த சிறுமிக்கு ஏராளமானோர் ஆதரவு தெரிவித்தனர். இதன் மூலம் தற்போது வரை அந்த சிறுமிக்காக 36,166 பவுண்டுகள் நிதி திரட்டப்பட்டுள்ளது. இது இந்திய மதிப்பில் சுமார் 37 லட்சத்து 23 ஆயிரம் ரூபாய் ஆகும். இது குறித்து ஜோயல் ஹுயுக்ஸ் கூறுகையில், இங்கிலாந்தில் உள்ளவர்கள் அனைவரும் மோசமானவர்கள் இல்லை என்று அந்த சிறுமி தெரிந்து கொள்ள இது உதவியாக இருக்கும் என்று தெரிவித்துள்ளார்.

இந்நிலையில் இந்த தொகை முழுவதையும் ஐக்கிய நாடுகள் சபையின் குழந்தைகளுக்கான தொண்டு நிதியமாக செயல்பட்டு வரும் யூனிசெப் (UNICEF) அமைப்பிற்கு வழங்க அந்த சிறுமியின் குடும்பம் முடிவு செய்துள்ளது. இந்த அமைப்பிற்கு பணத்தை வழங்க வேண்டும் என்பதை சிறுமியின் விருப்பத்தின்படியே முடிவு செய்ததாக அவளது பெற்றோர் தெரிவித்துள்ளனர்.

இந்த நிதியை திரட்டுவதற்கு காரணமாக இருந்த ஜோயல் ஹுயுக்ஸ் இது பற்றி கூறுகையில், சிறுமியின் குடும்பம் எடுத்த முடிவு நெகிழ்ச்சியை ஏற்படுத்துவதாகவும், இதற்காக நிதி வழங்கிய 3,248 பேருக்கும் நன்றி தெரிவித்துக் கொள்வதாகவும் அவர் கூறியுள்ளார்.