மாஸ்கோ,
உலக அளவில் கொரோனா வைரஸ் தொற்று பாதிப்பில் முதலிடத்தில் அமெரிக்காவும், இரண்டாம் இடத்தில் இந்தியாவும், மூன்றாவது இடத்தில் பிரேசிலும் உள்ளன. இதுவரை 5 கோடிக்கும் அதிகமானோர் கொரோனா வைரசால் பாதிக்கப்பட்டுள்ளனர். வைரஸ் தொற்றுக்கு இதுவரை 12.58 லட்சத்துக்கும் அதிகமானோர் உயிரிழந்துள்ளனர்.
ஐரோப்பிய நாடுகளில் தற்போது கொரோனா வைரஸ் 2வது அலை மிகத் தீவிரமாக பரவி வருகிறது. இதனால் பிரான்ஸ், இங்கிலாந்து உள்ளிட்ட நாடுகளில் மீண்டும் ஊரடங்கு அமல்படுத்தப்பட்டுள்ளது. இந்நிலையில் ரஷ்யாவில் கடந்த சில தினங்களாக கொரோனா வைரஸ் தொற்று அதிகரித்து வருகிறது. கொரோனாவால் அதிகம் பாதிக்கப்பட்ட நாடுகளின் வரிசையில் ரஷ்யா 4-வது இடத்தில் உள்ளது.
ரஷ்யாவில் கடந்த 24 மணி நேரத்தில் மேலும் 20,498 பேருக்கு கொரோனா தொற்று உறுதி செய்யப்பட்டுள்ளது. இதன்மூலம் ரஷ்யாவில் வைரஸ் தொற்றால் பாதிக்கப்பட்டோர் எண்ணிக்கை தற்போது 17,74,334 ஆக உயர்ந்துள்ளது. கொரோனா தொற்றுக்கு மேலும் 286 பேர் உயிரிழந்ததால், அங்கு பலியானோர் எண்ணிக்கை 30 ஆயிரத்து 537 ஆக உயர்ந்துள்ளது.
ரஷ்யாவில் இதுவரை கொரோனா தொற்றில் இருந்து 13,24,419 பேர் சிகிச்சை பெற்று குணமடைந்து வீடு திரும்பியுள்ளனர். தற்போது 4,19,378 பேர் மருத்துவமனைகளில் சிகிச்சை பெற்று வருகின்றனர்.