இலங்கையில், ஞாயிற்றுக்கிழமை தேவாலயங்கள் மீண்டும் திறக்கப்படுகிறது

இந்த குண்டுவெடிப்புகளில் தமிழ்வழிக் கல்வி ஆசிரியர் ஒருவர், பள்ளிக்கூட முதல்வர் ஒருவர் உள்பட 106 பேர் கைது செய்யப்பட்டுள்ளனர். இந்த நாசவேலைக்கு பயன்படுத்தப்பட்ட வெடிகுண்டுகள் ஒரு கண்டெய்னர் லாரியிலும், வேனிலும்தான் கொண்டு வரப்பட்டதாக தெரிய வந்தது. இலங்கையில், அடுத்தடுத்து பல்வேறு இடங்களில் சந்தேக நபர்களை கைது செய்யும் நடவடிக்கை தீவிரம் பெற்றது.

இதற்கிடையில், குண்டு வெடிப்பு சம்பவங்களைத் தொடர்ந்து அங்குள்ள தேவாலயங்களில் பிரார்த்தனைகள் நிறுத்தி வைக்கப்பட்டன. இந்த நிலையில், வரும் ஞாயிற்றுக்கிழமை பொதுப் பிரார்த்தனைக் கூட்டங்கள், மீண்டும் தொடங்கும் என்று அறிவிக்கப்பட்டுள்ளது. இது குறித்து இலங்கை கத்தோலிக்க பாதிரியார் மால்கம் ரஞ்சித் கூறுகையில், தொடர் குண்டுவெடிப்புக்குப் பிறகு நிறுத்தி வைக்கப்பட்டிருந்த பொது பிரார்த்தனைக் கூட்டங்கள், வரும் ஞாயிற்றுக்கிழமை முதல் மீண்டும் நடத்தப்படும்.

தேர்ந்தெடுக்கப்பட்ட சில தேவாலயங்களில் மட்டும் அத்தகைய பிரார்த்தனைக் கூட்டங்கள் நடைபெறும். பாதுகாப்பு காரணங்களுக்காக, தேவாலயங்களுக்குள் பைகள் எடுத்துச் செல்ல அனுமதிக்கப்படாது. அத்துடன், அறிமுகமில்லாத புதிய நபர்கள் தேவாலயத்துக்குள் செல்வதற்கும் அனுமதி அளிக்கப்படாது. இதற்காக, உள்ளூர் மக்களைக் கொண்ட கண்காணிப்புக் குழுக்கள் அமைக்கப்படும்.

தேவாலயங்களுக்கு வரும் நபர்களின் அடையாளத்தை அந்தக் குழுக்கள் உறுதி செய்த பிறகே அவர்கள் பிராத்தனைக் கூடங்களுக்கு அனுப்பப்படுவார்கள் என்றார்