அமெரிக்காவை தொடர்ந்து ரஷியாவும் கை கொடுக்குமா?

என்ன செய்யப்போகிறோம் என்று தவித்துக்கொண்டிருக்கும் நேரத்தில் அமெரிக்காவும், கனடாவும் உதவிக்கரம் நீட்ட முன்வந்துள்ளன. உடனடியாக அமெரிக்கா 10 லட்சம் டன் சமையல் கியாசை இந்தியாவுக்கு தருகிறது. அமெரிக்காவில் இருந்து ஹார்முஸ் நீரிணை வழியாக இந்த சமையல் கியாசை ஏற்றிக்கொண்டு கப்பல்கள் வர தேவையில்லை. தென்கிழக்கு ஆசியா கடல்பாதை வழியாக கொண்டுவரப்படும்.

இந்த சமையல் கியாசை ஒரு கப்பலில் 50 ஆயிரம் டன் என்று 20 பெரிய கப்பல்களில் கொண்டுவரவும், அந்த கப்பல்கள் இந்த மாத கடைசியில் இந்திய துறைமுகங்களுக்கு வந்து சேரும்வகையிலும் திட்டமிடப்பட்டுள்ளது. இதுபோல அமெரிக்கா, கனடாவில் இருந்து மேலும் 20 கப்பல்களில் சமையல் கியாஸ் கொண்டுவரவும் நடவடிக்கை எடுக்கப்பட்டுவருகிறது. இது நமது ஒருமாத மொத்த தேவையில் பாதி அளவைக்கூட பூர்த்தி செய்யாது.

இந்தியாவுக்கு சிறந்த மாற்றுவழி, ரஷியாவிடம் இருந்து கியாஸ் வாங்குவதுதான். ரஷியாதான் ஐரோப்பிய நாடுகளுக்கான கியாஸ் தேவையை பெருமளவில் நிறைவேற்றி வருகிறது. அமெரிக்காவின் வரிவிதிப்பு அச்சுறுத்தலால், ரஷியாவிடம் இருந்து கச்சா எண்ணெய் வாங்குவதை குறைத்ததால், ரஷியா இந்தியாவுடன் இனி நட்பு கிடையாது, எல்லாம் வியாபாரம்தான் என்று கறாராக சொல்லி நீண்டகால உறவில் விரிசலை ஏற்படுத்திவிட்டது.

நமது தேவைக்கு கச்சா எண்ணெயை எந்த நாட்டிடம் இருந்தும் வாங்கிக்கொள்ள உரிமை இருக்கிறது. இதற்கு அமெரிக்கா எப்படி கட்டுப்பாடு விதிக்கமுடியும் என்ற கேள்விகள் இப்போது மக்கள் மனதில் எழுகின்றன. ஆக ரஷியா உடனான நட்பை மீண்டும் மலர செய்வதன் மூலம் மட்டுமே இப்போது ஏற்பட்டிருக்கும் நெருக்கடிக்கு முற்றுப்புள்ளி வைக்கமுடியும். வளைகுடாவில் பிரச்சினை என்றால் நமது எரிபொருள் தேவையை நிறைவேற்ற ரஷியாதான் கை கொடுக்கமுடியும்.