புதுடெல்லி,
அடுத்த மாதம் நடைபெறவுள்ள இந்தியா - ஆப்கானிஸ்தான் அணிகளுக்கு இடையிலான 3 போட்டிகள் கொண்ட டி20 தொடரின் போட்டித் தேதிகளை மாற்றுவது குறித்து ஆப்கானிஸ்தான் கிரிக்கெட் வாரியம் (ACB)மற்றும் இந்திய கிரிக்கெட் கட்டுப்பாட்டு வாரியம் (BCCI) இடையே பேச்சுவார்த்தை நடைபெற்று வருவதாக தகவல் வெளியாகியுள்ளது.
தற்போதைய அட்டவணைப்படி, இந்தியா - ஆப்கானிஸ்தான் அணிகள் மோதும் 3 டி20 போட்டிகள் செப்டம்பர் 13, 15 மற்றும் 17 ஆகிய தேதிகளில் நடைபெற உள்ளன.
இந்த தேதிகளை மாற்றி, செப்டம்பர் 11, 13 மற்றும் 14 ஆகிய தேதிகளில் போட்டிகளை நடத்த வேண்டும் என்று ஆப்கானிஸ்தான் கிரிக்கெட் வாரியம் கோரிக்கை விடுத்துள்ளதாக கூறப்படுகிறது.
இந்தியாவில் அந்த காலகட்டத்தில் நடைபெறவுள்ள பண்டிகைகளை கருத்தில் கொண்டு தேதிகளை மாற்ற ஆப்கானிஸ்தான் வாரியம் விரும்புவதாக கூறப்படுகிறது.
இந்த தேதிகளில் போட்டி நடத்தப்பட்டால் மைதானத்திற்கு நேரில் வரும் ரசிகர்களின் எண்ணிக்கையையும், தொலைக்காட்சி மற்றும் பிற ஒளிபரப்பு தளங்களில் போட்டிகளை பார்க்கும் பார்வையாளர்களின் எண்ணிக்கையையும் அதிகரிக்க முடியும் என ஆப்கானிஸ்தான் கிரிக்கெட் வாரியம் கருதுவதாக தெரிகிறது.
டி20 போட்டிகளின் தேதிகளை மாற்றுவது குறித்து இரு தரப்பில் இருந்தும் இதுவரை அதிகாரபூர்வ அறிவிப்பு எதுவும் வெளியாகவில்லை.