ஐபிஎல் தொடர்: தோனி - ரோகித் சர்மா நாளைய போட்டியில் களமிறங்க வாய்ப்பு

சென்னை,

5 முறை ஐ.பி.எல் கோப்பையை வென்று சாதனை படைத்த சென்னை சூப்பர் கிங்ஸ் – மும்பை இந்தியன்ஸ் அணிகள் நாளை (23-ந்தேதி) மோதுகின்றன. மும்பை வான்கடே மைதானத்தில் இரவு 7.30 மணிக்கு இந்த ஆட்டம் நடைபெறுகிறது. இரு அணிகளும் 2 வெற்றி, 4 தோல்வியுடன் 4 புள்ளிகள் பெற்றுள்ளன. இதனால் 3-வது வெற்றியை பெறப்போவது சென்னையா? மும்பையா? என்று ஆவலுடன் எதிர்பார்க்கப்படுகிறது. ரன் ரேட் அடிப்படையில் மும்பை 7-வது இடத்திலும், சென்னை 8-வது இடத்திலும் உள்ளன.சி.எஸ்.கே. முதல் 3 ஆட்டங்களில் தோற்று பின்னர் 2 வெற்றிகளை பெற்றது. கடைசியாக ஆடிய போட்டியில் தோல்வியை சந்தித்தது. மும்பை அணி முதல் ஆட்டத்தில் வெற்றி பெற்றது. பின்னர் தொடர்ச்சியாக 4 ஆட்டங்களில் தோல்வியை தழுவிய பிறகு, கடந்த போட்டியில் வெற்றி பாதைக்கு திரும்பியது.சென்னை சூப்பர் கிங்ஸ் அணி மும்பையை வீழ்த்தி 3-வது வெற்றியை பெறுமா? என்று ரசிகர்கள் ஆவலுடன் எதிர்நோக்கி உள்ளனர். மும்பையை அதன் சொந்த மண்ணில் வீழ்த்துவது சவாலானதாக இருக்கும்.