டெஸ்ட் கிரிக்கெட்: இந்தியா - இங்கிலாந்து பெண்கள் அணியினர் இன்று மோதல்

லண்டன்,

இந்தியா- இங்கிலாந்து பெண்கள் அணிகள் இடையிலான டெஸ்ட் கிரிக்கெட் போட்டி லண்டன் லார்ட்ஸ் மைதானத்தில் இன்று தொடங்குகிறது.

லார்ட்சில் முதல் பெண்கள் டெஸ்ட்

சமீபத்தில் இங்கிலாந்தில் நடந்த பெண்கள் 20 ஓவர் உலகக் கோப்பை போட்டியின் லீக் சுற்றில் இந்திய அணி, தென்ஆப்பிரிக்கா, ஆஸ்தி ரேலியாவிடம் தோல்வி கண்டு அரைஇறுதி வாய்ப்பை இழந்து ஏமாற்றம் அளித்தது.

இந்த நிலையில் ஹர்மன்பிரீத் கவுர் தலைமையிலான இந்திய பெண்கள் அணி, நாட்சிவெர் தலைமையிலான இங்கிலாந்து அணியுடன் ஒரே ஒரு டெஸ்ட் போட்டியில் மோதுகிறது. இந்த டெஸ்ட் போட்டி புகழ் பெற்ற லண்டன் லார்ட்ஸ் மைதானத்தில் இன்று (வெள்ளிக்கிழமை) முதல் 13-ந் தேதி வரை நடக்கிறது.

142 ஆண்டு காலமாக லார்ட்ஸ் மைதானத்தில் ஆண்கள் டெஸ்ட் போட்டி நடைபெற்று வருகிறது. கிரிக்கெட்டின் தாயகம் என்று அழைக்கப்படும் லார்ட்சில் அரங்கேறும் முதல் பெண்கள் டெஸ்ட் போட்டி இதுவாகும். இதனால் இந்த போட்டி அதிக முக்கியத்துவம் பெறுகிறது.

இதே மைதானத்தில் கடந்த வாரம் இறுதியில் நடந்த 20 ஓவர் உலகக் கோப்பை இறுதி ஆட்டத்தில் ஆஸ்திரேலியாவிடம் தோற்று கோப்பையை வெல்லும் வாய்ப்பை இழந்த கையோடு இங்கிலாந்து அணி இந்த போட்டியில் களம் இறங்குகிறது.