தாஷ்கண்ட்,
யு20 ஆசியக் கோப்பை கால்பந்து தொடரின் பிரதான சுற்றுக்கு இந்திய யு20 அணி 20 ஆண்டுகளுக்குப் பிறகு தகுதி பெற்றுள்ளது.
தாஷ்கண்டில் நேற்று நடைபெற்ற குரூப் பி தகுதிச்சுற்றின் கடைசி ஆட்டத்தில் இந்தியா - வங்காளதேசம் அணிகள் மோதின. இப்போட்டியில் வெற்றி கட்டாயம் என்ற நிலையில் களமிறங்கிய இந்திய அணி, தொடக்கம் முதலே சிறப்பாக விளையாடியது.
போட்டியின் 25-வது நிமிடத்தில் டேனி மெய்தெய் லைஷ்ரம் கோல் அடித்து இந்தியாவை முன்னிலைப்படுத்தினார். 60-வது நிமிடத்தில் விஷால் யாதவ் அசத்தலான முறையில் கோல் அடித்து இந்தியாவின் முன்னிலையை 2-0 என உயர்த்தினார். தொடர்ந்து மாற்று வீரராக களமிறங்கிய முகமது அர்பாஷ் 79-வது நிமிடத்தில் கோல் அடிக்க, இந்தியா 3-0 என வெற்றி பெற்றது.
வங்காளதேசத்துக்கு எதிரான வெற்றியின் மூலம் இந்தியா 3 போட்டிகளில் 6 புள்ளிகளைப் பெற்றது. எனினும், தகுதி மற்றொரு போட்டியின் முடிவை சார்ந்திருந்தது.
அதன்பின்னர் நடைபெற்ற சிரியா - உஸ்பெகிஸ்தான் ஆட்டத்தில், உஸ்பெகிஸ்தான் 3-0 என்ற கோல் கணக்கில் சிரியாவை வீழ்த்தியது. இதன் மூலம் இந்தியாவின் தகுதி உறுதியானது.
உஸ்பெகிஸ்தான் 9 புள்ளிகளுடன் குரூப் பி-யில் முதலிடத்தைப் பிடித்தது. இந்தியா 6 புள்ளிகளுடன் 2-வது இடத்தையும், சிரியா 3 புள்ளிகளுடன் 3-வது இடத்தையும் பிடித்தன. வங்காளதேசம் புள்ளிகள் எதுவுமின்றி கடைசி இடத்தைப் பிடித்தது.
8 குழுக்களில் 2-வது இடம் பிடித்த சிறந்த 7 அணிகள் ஆசியக் கோப்பைக்கு முன்னேறும் நிலையில், இந்தியா அந்த 7 அணிகளில் ஒன்றாக இடம்பிடித்து தகுதி பெற்றது.
இந்தியா கடைசியாக 2006-ம் ஆண்டு யு20 ஆசியக் கோப்பையில் விளையாடியது. அதன் பின்னர் 20 ஆண்டுகளாக தகுதி பெற முடியாமல் இருந்த நிலையில், தற்போது அந்த நீண்ட காத்திருப்புக்கு முற்றுப்புள்ளி வைக்கப்பட்டுள்ளது.
யு20 ஆசியக் கோப்பை சீனாவில் 2027-ம் ஆண்டு மார்ச் 24 முதல் ஏப்ரல் 10-ம் தேதி வரை நடைபெற உள்ளது.