கோவா,
8-வது இந்தியன் சூப்பர் லீக் கால்பந்து போட்டி (ஐ.எஸ்.எல்.) கோவாவில் நடந்து வருகிறது. கொரோனா தடுப்பு விதிமுறைகளை பின்பற்றி கோவாவில் உள்ள 3 மைதானங்களில் ரசிகர்கள் இன்றி நடைபெறும் இந்த போட்டிகள் மார்ச் மாதம் வரை நீடிக்கிறது.
இந்த நிலையில் இன்று நடைபெற்ற ஆட்டத்தில் ஏடிகே மோகன் பகான் மற்றும் நார்த் ஈஸ்ட் யுனைடெட் அணிகள் மோதின. இந்த ஆட்டத்தில் நார்த் ஈஸ்ட் யுனைடெட் அணியை வீழ்த்தி ஏடிகே மோகன் பகான் அணி தன்னுடைய 7-வது வெற்றியை பெற்றது.
இந்த ஆட்டத்தில் மோகன் பகான் அணி சார்பில் ஜோனி, லிஸ்டன், மன்விர் சிங் ஆகியோர் தலா ஒரு கோல் அடித்தனர். மேலும் நார்த் ஈஸ்ட் யுனைடெட் அணி சார்பில் வி.பி. சுகைர் ஆட்டத்தின் 17வது நிமிடத்தில் ஒரு கோல் அடித்தார்.
இதையடுத்து ஏடிகே மோகன் பகான் அணி 3-1 என்ற கோல் கணக்கில் நார்த் ஈஸ்ட் யுனைடெட் அணியை வீழ்த்தி வெற்றி பெற்றது. நாளை இரவு 7.30 மணிக்கு நடைபெறும் லீக் ஆட்டத்தில் மும்பை சிட்டி-ஒடிசா அணிகள் மோதுகின்றன.