டோக்கியோ,
டோக்கியோ ஒலிம்பிக் போட்டிகளில் இன்று நடைபெற்ற லீக் சுற்று ஆட்டத்தில் இந்திய மகளிர் ஆக்கி அணி பிரிட்டன் மகளிர் ஆக்கி அணியை எதிர்கொண்டது.
ஆட்டம் தொடங்கிய 2-வது நிமிடத்திலேயே பிரிட்டன் வீராங்கனை ஹனா மார்ட்டின் முதல் கோல் அடித்தார். ஆட்டத்தின் 19-வது நிமிடத்தில் ஹனா இரண்டாவது கோல் அடித்தார். பின்னர் ஆட்டத்தின் 23-வது நிமிடத்தில் இந்திய அணி வீராங்கனை ஷர்மிளா தேவி கோல் அடித்து இந்திய அணியின் கோல் கணக்கை தொடங்கிவைத்தார். இதனால், ஆட்டம் சூடுபிடித்தது.
ஆனால், போட்டியின் 3-வது கால்பாகத்தில் கிடைத்த பெனால்டி கார்னர் வாய்ப்பை சிறப்பாக பயன்படுத்திய பிரிட்டன் வீராங்கனைகள் கோல் அடித்தனர். இதனால், பிரிட்டன் அணியின் கோல் எண்ணிக்கை 3 ஆக உயர்ந்தது.
அதன்பின்னர், போட்டியின் 57-வது நிமிடத்தில் பிரிட்டன் வீராங்கனை கிரேஸ் கோல் அடித்ததால் அந்த அணியின் கோல் எண்ணிக்கை 4 ஆக அதிகரித்தது. ஆனால், இறுதிவரை போராடிய இந்திய அணியால் 1 கோல் மட்டுமே அடிக்க முடிந்தது. இதனால், இந்தியாவை 4-1 என்ற கோல் கணக்கில் வீழ்த்தி பிரிட்டன் அணி அபார வெற்றிபெற்றது.
லீக் சுற்றின் அடுத்த போட்டில் இந்திய பெண்கள் ஆக்கி அணி அயர்லாந்தை எதிர்கொள்கிறது. இரு அணிகளும் மோதும் போட்டி நாளைமறுநாள் நடைபெற உள்ளது.