மெல்போர்ன்,
ஆண்டின் முதல் 'கிராண்ட்ஸ்லாம்' போட்டியான ஆஸ்திரேலிய ஓபன் டென்னிஸ் தொடர் மெல்போர்னில் நடைபெற்று வருகிறது. பல முன்னணி வீரர்,வீராங்கனைகள் பங்கேற்றுள்ள இந்த போட்டி, வருகிற 28-ந்தேதி வரை நடக்கவுள்ளது. தொடர் தற்போது விறுவிறுப்பான கட்டத்தை எட்டியுள்ளது.
இந்நிலையில் இந்த தொடரில் இன்று நடைபெற்ற ஆண்கள் இரட்டையர் பிரிவின் 3வது சுற்று ஆட்டத்தில் இந்தியாவின் ரோகன் போபண்ணா - ஆஸ்திரேலியாவின் மேத்யூ எப்டன் இணை நெதர்லாந்தின் வெஸ்லி கூல்ஹோப் - குரோஷியாவின் நிகோலா மெக்டிக் இணையுடன் மோதியது.
இந்த ஆட்டத்தில் அபாரமாக செயல்பட்ட போபண்ணா இணை 7-6 (10-8), 7-6(7-4) என்ற செட் கணக்கில் வெஸ்லி கூல்ஹோப் - நிகோலா மெக்டிக் இணையை வீழ்த்தி காலிறுதிக்கு முன்னேறியது.