டோக்கியோ,
பான் பசிபிக் ஓபன் பெண்கள் சர்வதேச டென்னிஸ் போட்டி ஜப்பான் தலைநகர் டோக்கியோவில் நடந்து வருகிறது. இதில் ஒற்றையர் பிரிவில் நேற்று நடந்த முதல் சுற்று ஆட்டம் ஒன்றில் நடப்பு சாம்பியனும், 4 கிராண்ட்ஸ்லாம் பட்டம் வென்றவருமான நவோமி ஒசாகா (ஜப்பான்), தரவரிசையில் 55-வது இடத்தில் உள்ள டாரியா சாவில்லியை (ஆஸ்திரேலியா) எதிர்கொண்டார்.
முதல் செட்டில் நவோமி ஒசாகா 1-0 என்ற கணக்கில் முன்னிலையில் இருந்த போது டாரியா சாவில்லி காயம் காரணமாக விலகினார். இதனால் நவோமி ஒசாகா 2-வது சுற்றுக்கு முன்னேறினார். மற்றொரு ஆட்டத்தில் முன்னாள் நம்பர் ஒன் வீராங்கனை கரோலினா பிளிஸ்கோவா 6-2, 6-1 என்ற நேர்செட்டில் பல்கேரியாவின் இசபெல்லா ஷினிகோவாவை தோற்கடித்து 2-வது சுற்றுக்கு தகுதி பெற்றார்.
இதேபோல் கொரியா ஓபன் பெண்கள் சர்வதேச டென்னிஸ் போட்டி சியோலில் நடந்து வருகிறது. இதன் முதலாவது சுற்றில் இந்திய வீராங்கனை அங்கிதா ரெய்னா 4-6, 7-5, 6-1 என்ற செட் கணக்கில் ஆஸ்திரேலியாவின் மேடிசன் இங்லிஸ்சை தோற்கடித்து 2-வது சுற்றுக்குள் நுழைந்தார். மற்றொரு ஆட்டத்தில் கனடாவின் புசார்ட் 6-7 (5-7), 6-7 (5-7) என்ற நேர்செட்டில் ஜெர்மனியின் தாட்ஜனா மரியாவிடம் வீழ்ந்து வெளியேறினார்.