சின்சினாட்டி ஓபன் சர்வதேச டென்னிஸ் போட்டி அமெரிக்காவில் நடந்து வருகிறது. இதில் நேற்று முன்தினம் இரவு நடந்த ஆண்கள் ஒற்றையர் பிரிவின் கால்இறுதி ஆட்டம் ஒன்றில் 'நம்பர் ஒன்' வீரர் டேனில் மெட்விடேவ் (ரஷியா) 7-6 (7-1), 6-3 என்ற நேர்செட்டில் அமெரிக்காவின் டெய்லர் பிரிட்ஸ்சை விரட்டியடித்து அரைஇறுதிக்கு முன்னேறினார். 7-ம் நிலை வீரர் சிட்சிபாஸ் (கிரீஸ்) 7-6 (7-5), 5-7, 6-3 என்ற செட் கணக்கில் அமெரிக்காவின் ஜான் இஸ்னரை வீழ்த்தி தொடர்ந்து 3-வது முறையாக அரைஇறுதிக்குள் அடியெடுத்து வைத்தார். இதே போல் இங்கிலாந்து வீரர் கேமரூன் நோரி 7-6 (7-4), 6-7 (4-7), 6-4 என்ற செட் கணக்கில் ஸ்பெயினின் கார்லோஸ் அல்காரசையும், குரோஷியாவின் போர்னா கோரிச் 6-4, 6-4 என்ற நேர்செட்டில் கனடாவின் பெலிக்ஸ் அஜெர் அலியாசிம்மையும் வீழ்த்தி அரைஇறுதிக்கு தகுதி பெற்றனர்.

பெண்கள் ஒற்றையர் பிரிவில் நேற்று நடந்த அரைஇறுதியில் முன்னாள் விம்பிள்டன் சாம்பியனான பெட்ரா கிவிடோவா (செக்குடியரசு) 6-7 (6-8), 6-4,6-3 என்ற செட் கணக்கில் அமெரிக்காவின் மேடிசன் கீசை போராடி வீழ்த்தி இறுதிப்போட்டிக்குள் நுழைந்தார். மற்றொரு அரைஇறுதியில் கரோலின் கார்சியா (பிரான்ஸ்)- சபலென்கா (பெலாரஸ்) ஆகியோர் மோதுகிறார்கள்.