மியாமி,

மியாமி ஓபன் சர்வதேச டென்னிஸ் போட்டி அமெரிக்காவில் நடந்தது. இதன் ஆண்கள் ஒற்றையர் பிரிவு இறுதிப்போட்டியில் 32 வயதான அமெரிக்க வீரர் ஜான் இஸ்னர், 20 வயதான அலெக்சாண்டர் ஸ்வெரேவ்வை (ஜெர்மனி) எதிர்கொண்டார். விறுவிறுப்பான இந்த ஆட்டத்தில் ஜான் இஸ்னர் 6-7 (4-7), 6-4, 6-4 என்ற செட் கணக்கில் அலெக்சாண்டர் ஸ்வெரேவ்வை சாய்த்து சாம்பியன் பட்டத்தை கைப்பற்றினார். இந்த ஆட்டம் 2 மணி 29 நிமிடம் நீடித்தது. இந்த வெற்றியின் மூலம் ஜான் இஸ்னர் 8 இடங்கள் முன்னேறி உலக தரவரிசையில் 9-வது இடத்தை பிடித்துள்ளார். தோல்வி கண்ட அலெக்சாண்டர் ஸ்வெரேவ் ஒரு இடம் ஏற்றம் கண்டு 4-வது இடத்தை பிடித்துள்ளார். ஆண்கள் ஒற்றையர் பிரிவில் ஸ்பெயின் வீரர் ரபெல் நடால் முதலிடம் பிடித்துள்ளார். சுவிட்சர்லாந்து வீரர் ரோஜர் பெடரர் 2-வது இடத்துக்கு சரிந்துள்ளார்.