மியாமி ஓபன் டென்னிஸ்: ரைபகினா, கிவிடோவா இறுதிப்போட்டிக்கு முன்னேற்றம்

மியாமி,

மியாமி ஓபன் சர்வதேச டென்னிஸ் போட்டி அமெரிக்காவில் நடந்து வருகிறது. இதில் பெண்கள் ஒற்றையர் பிரிவில் நேற்று நடைபெற்ற அரைஇறுதி ஆட்டம் ஒன்றில் விம்பிள்டன் சாம்பியனும், உலக தரவரிசையில் 7-வது இடத்தில் இருப்பவருமான எலினா ரைபகினா (கஜகஸ்தான்) 7-6 (7-3), 6-4 என்ற நேர்செட்டில் 3-ம் நிலை வீராங்கனையான அமெரிக்காவின் ஜெசிகா பெகுலாவை வீழ்த்தி இறுதிப்போட்டிக்கு முன்னேறினார்.

சர்வதேச போட்டியில் ரைபகினா தொடர்ச்சியாக பெற்ற 13-வது வெற்றி இதுவாகும். இந்த ஆட்டத்தில் ரைபகினா எதிராளி எதிர்கொள்ள முடியாத அளவுக்கு 10 ஏஸ் சர்வீஸ்கள் போட்டு அசத்தினார். இதன் மூலம் 2016-ம் ஆண்டுக்கு பிறகு ஒரு தொடரில் 5 ஆட்டங்களில் தொடர்ச்சியாக 10 மற்றும் அதற்கு அதிகமான ஏஸ் சர்வீஸ் வீசிய முதல் வீராங்கனை என்ற பெருமையை ரைபகினா பெற்றார்.

அதேபோல் இன்று நடைபெற்ற அரைஇறுதி ஆட்டம் ஒன்றில் 2 முறை விம்பிள்டன் பட்டம் வென்றவரான பெட்ரா கிவிடோவா (செக்குடியரசு) 7-5, 6-4 என்ற செட் கணக்கில் சொரானா சிர்ஸ்டியாவை (ரோமானியா) சாய்த்து இறுதிபோட்டிக்குள் முதல்முறையாக நுழைந்தார்.

நாளை நடைபெறவுள்ள இறுதிப்போட்டியில் எலினா ரைபகினா, பெட்ரா கிவிடோவா இருவரும் பலப்பரீட்சை நடத்துகின்றனர்.