மான்ட்கார்லோ மாஸ்டர்ஸ் டென்னிஸ்: கிரீஸ் வீரர் சிட்சிபாஸ் சாம்பியன்..!

மான்ட்கார்லோ,

மான்ட்கார்லோ மாஸ்டர்ஸ் சர்வதேச டென்னிஸ் போட்டி மொனாக்கோவில் நடந்து வந்தது. இதில் ஒற்றையர் பிரிவில் நேற்று நடந்த இறுதி ஆட்டத்தில் நடப்பு சாம்பியனும், தரவரிசையில் 5-வது இடம் வகிப்பவருமான சிட்சிபாஸ் (கிரீஸ்), 46-ம் நிலை வீரர் டேவிடோவிச் போகினாவை (ஸ்பெயின்) சந்தித்தார்.

1 மணி 36 நிமிடங்கள் நீடித்த இந்தமோதலில் சிட்சிபாஸ் 6-3, 7-6 (7-3) என்ற நேர் செட்டில் போகினாவை தோற்கடித்து மீண்டும் மகுடம் சூடினார்.

'ஓபன் எரா' வரலாற்றில் (1968-ம் ஆண்டுக்கு பிறகு) இந்த பட்டத்தை அடுத்தடுத்து வெல்லும் 6-வது வீரர் சிட்சிபாஸ் ஆவார். அவருக்கு ஏறக்குறைய ரூ.7 கோடி பரிசுத்தொகையுடன், ஆயிரம் தரவரிசை புள்ளிகளும் கிடைத்தது.

தோல்வி அடைந்த போகினா தரவரிசையில் 27-வது இடத்துக்கு முன்னேறுகிறார். அவர் 2-வது சுற்றில் 'நம்பர் ஒன்' வீரர் ஜோகோவிச்சுக்கு அதிர்ச்சி அளித்தது குறிப்பிடத்தக்கது.