நடிகர் நடிகைகள் சமீப காலமாக அதிக விளம்பர படங்களில் நடிக்க தொடங்கி உள்ளனர். சிலர் மதுபானம் மற்றும் புகையிலை விளம்பர படங்களில் நடிக்கிறார்கள். இந்தி நடிகர் அக்ஷய்குமார் பான் மசாலா விளம்பரத்தில் நடித்து ரசிகர்களின் கடுமையான எதிர்ப்புக்கு ஆளானார். இதையடுத்து இனிமேல் இதுபோன்ற விளம்பரங்களில் நடிக்க மாட்டேன் என்று மன்னிப்பு கேட்டார். தமன்னா, பூஜா ஹெக்டே, ஹன்சிகா, காஜல் அகர்வால் ஆகியோர் மதுபான விளம்பரங்களில் நடித்து எதிர்ப்புக்கு ஆளானார்கள்.
இந்த நிலையில் பிரபல இந்தி இளம் நடிகை அலியாபட் சர்க்கரையால் தயாரிக்கப்பட்ட பொருட்களை சாப்பிடவும், குடிக்கவும் தூண்டும்படியான விளம்பரத்தில் நடித்து சர்ச்சையில் சிக்கியுள்ளார். ஏற்கனவே தொலைக்காட்சி நிகழ்ச்சியொன்றில் சர்க்கரை கலந்த பானத்தை குடிக்க மாட்டேன். சர்க்கரை ஆரோக்கியத்துக்கு கேடு என்று சொல்லி இருந்தார்.
அதை சுட்டி காட்டி, இப்போது ஏன் சர்க்கரை கலந்த பானத்தை குடிக்கும் விளம்பரத்தில் நடித்து இருக்கிறீர்கள்? விஷத்தை குடிக்க எங்களை தூண்டுகிறீர்களா? என்று ரசிகர்கள் வலைத்தளத்தில் சாடி வருகிறார்கள்.