இன்று பிறந்தநாள் கொண்டாடும் சினிமா பிரபலங்கள்

சென்னை,

வடிவேலு

தமிழ்த் திரையுலகில் நகைச்சுவை நடிகராக பல வெற்றிப்படங்களில் நடித்துள்ளவர் வடிவேலு. நடிகர் மட்டுமில்லாமல் சில பாடல்களும் பாடியுள்ளார். மதுரையை சேர்ந்த வடிவேலு 1988-ல் டி.ராஜேந்தர் இயக்கத்தில் வெளியான 'என் தங்கை கல்யாணி' என்ற திரைப்படத்தின் மூலமாகத் தமிழ்த் திரையுலகத்திற்கு அறிமுகமானார். வடிவேலு தனது அசாத்தியமான நகைச்சுவை கலந்த நடிப்புத் திறமையால் 'வைகைப்புயல்' என்றும் அழக்கப்படுகிறார். வைகைப்புயல் வடிவேலு இன்று தனது 64-வது பிறந்தநாளை கொண்டாடுகிறார்.

கவுதம் கார்த்திக்

தமிழ் திரையுலகின் வளர்ந்து வரும் நடிகராக இருப்பவர் கவுதம் கார்த்திக். இவர் கடந்த 2013-ம் ஆண்டு வெளியான மணிரத்தினம் இயக்கிய 'கடல்' திரைப்படத்தில் நாயகனாக அறிமுகமானார். அதனைத்தொடர்ந்து, 'வைராஜா வை, தேவராட்டம், பத்து தல, ஆகஸ்ட் 16 1947' உள்ளிட்ட பல படங்களில் நடித்துள்ளார். வளர்ந்து வரும் நடிகர் கவுதம் கார்த்திக் இன்று தனது 35-வது பிறந்தநாளை கொண்டாடுகிறார். தற்போது, கமல்ஹாசன் நடிப்பில் உருவாகி வரும் 'தக் லை' படத்தில் கவுதம் கார்த்திக் நடித்து வருகிறார்.

கிரிஷ்

தமிழ் சினிமாவின் பிரபல பின்னணிப் பாடகர் கிரிஷ். இவர் கடந்த 2006-ம் ஆண்டு வெளியான 'வேட்டையாடு விளையாடு' திரைப்படத்தில் வரும் மஞ்சள் வெய்யில் எனும் பாடலின் மூலம் பின்னணிப் பாடகராக அறிமுகமானார். இசை அமைப்பாளர் ஹாரிஸ் ஜெயராஜின் இசையில் இவர் பாடிய பல பாடல்கள் இவருக்கு வெற்றியைத் தந்துள்ளன. இன்று இவர் தனது 47-வது பிறந்தநாளை கொண்டாடுகிறார்.

அமலா அக்கினேனி

அமலா அக்கினேனி இந்திய திரைப்பட நடிகையும், பரதநாட்டிய நடன கலைஞரும் ஆவார். இவர் மலையாளம், கன்னடம், தெலுங்கு மற்றும் ஹிந்தி மொழி திரைப்படங்களில் நடித்துள்ளார். இன்று இவர் தனது 57-வது பிறந்தநாளை கொண்டாடுகிறார்.