தமிழ் திரையுலகில் முன்னணி கதாநாயகனாக இருக்கும் தனுஷ் ராஞ்சனா, ஷமிதாப் ஆகிய இந்தி படங்களில் நடித்து வட இந்தியாவிலும் பிரபலமானார். 'தி கிரேமேன்' மூலம் ஹாலிவுட்டிலும் கால் பதித்தார். ஆந்திரா, தெலுங்கானாவிலும் தனுஷ் படங்கள் வசூல் குவிக்கின்றன. தெலுங்கு நடிகர்களுக்கு இணையாக அவருக்கு அங்கு ரசிகர்கள் சேர்ந்துள்ளனர். இதனால் தமிழில் வெளியாகும் தனுஷ் படங்களை தெலுங்கிலும் டப்பிங் செய்து வெளியிடுகின்றனர்.
இந்த நிலையில் தெலுங்கு இயக்குனர்களும் தயாரிப்பாளர்களும் தனுசை நேரடி தெலுங்கு படங்களில் நடிக்க வைக்க ஆர்வம் காட்டுகின்றனர். தற்போது தெலுங்கு டைரக்டர் வெங்கி அட்லூரி இயக்கத்தில் 'சார்' என்ற தெலுங்கு படத்தில் தனுஷ் நடித்து வருகிறார். இந்த படத்தை வாத்தி என்ற பெயரில் தமிழிலும் வெளியிட உள்ளனர். தொடர்ந்து தெலுங்கு டைரக்டர் சேகர் கம்முலா இயக்கும் தெலுங்கு படத்தில் நடிக்கவும் ஒப்பந்தமாகி உள்ளார். விஜய்யை வைத்து வாரிசு படத்தை தயாரித்துள்ள பிரபல தெலுங்கு பட அதிபர் தில்ராஜுவும் தனுஷ் நடிக்கும் தெலுங்கு படமொன்றை தயாரிக்க இருப்பதாகவும் இந்த படத்தை தெலுங்கு இயக்குனர் கிஷோர் ரெட்டி டைரக்டு செய்ய இருப்பதாகவும் தகவல் வெளியாகி உள்ளது.
