ஸ்ரீதேவி பங்களா படத்தின் டிரெய்லர் வெளியாகி மறைந்த நடிகை ஸ்ரீதேவியின் வாழ்க்கையை பிரதிபலிப்பதுபோல் உள்ளதாக சர்ச்சையை கிளப்பி உள்ளது.
டிரெய்லரில் ஸ்ரீதேவி என்ற பெயரில் பிரியா வாரியர் நடிகையாக வருகிறார். சிகரெட் பிடிக்கிறார். மது அருந்துகிறார். ஒரு கட்டத்தில் கதறி அழுகிறார். பின்னர் குளியல் தொட்டியில் இறந்த பெண்ணின் இரண்டு கால்கள் மட்டும் வெளியே தெரிவதுபோல் டிரெய்லர் முடிகிறது.
துபாய் ஓட்டல் குளியல் அறையில் இறந்த ஸ்ரீதேவியின் வாழ்க்கையை மையப்படுத்தி இந்த படம் தயாராகி இருப்பதாக பேசப்படுகிறது. இதனால் ஸ்ரீதேவியின் கணவர் போனி கபூர் அதிர்ச்சியாகி படக்குழுவினருக்கு வக்கீல் நோட்டீஸ் அனுப்பி உள்ளார். போனிகபூர் வழக்கை சட்டப்படி சந்திப்போம் என்று ஸ்ரீதேவி பங்களா படத்தின் இயக்குனர் பிரசாந்த் மாம்பூலி தெரிவித்து உள்ளார்.
இந்த நிலையில் படம் குறித்து பிரியா வாரியர் விளக்கம் அளித்துள்ளார். அவர் கூறும்போது, ஒரு பெண் சூப்பர் ஸ்டார் பற்றிய கதைதான் இந்த படம். நான் பெண் சூப்பர் ஸ்டாராக நடித்து இருக்கிறேன். இது யாருடைய கதையும் அல்ல. கற்பனை கதை. லண்டனில் சில நாட்கள் படப்பிடிப்பு நடந்தது. இந்த மாதம் இறுதியில் அடுத்தகட்ட படப்பிடிப்பு தொடங்க இருக்கிறது என்றார்.