சென்னை,
பாலிவுட்டில் ஷாருக்கானுக்கு ஜோடியாக நயன்தாரா நடித்த ஜவான் திரைப்படம் வெளியாகி வசூல் ரீதியாக மாபெரும் வெற்றி பெற்றது. இதைத் தொடர்ந்து, நயன்தாராவின் இறைவன், அன்னபூரணி ஆகிய திரைப்படங்கள் கலவையான விமர்சனங்களைப் பெற்றன. 'அன்னபூரணி' படத்தைத் தொடர்ந்து நயன்தாரா பிரதான கதாபாத்திரத்தில் நடிக்கும் படம் 'மண்ணாங்கட்டி சின்ஸ் 1960'. 'ப்ளாக் ஷீப்' யூடியூப் சேனல் புகழ் ட்யூட் விக்கி இயக்கும் இப்படத்தை பிரின்ஸ் பிக்சர்ஸ் நிறுவனம் தயாரிக்கிறது. இப்படத்தில் நயன்தாரா தவிர, யோகி பாபு, தேவதர்ஷினி, கவுரி கிஷன், நரேந்திர பிரசாத் மற்றும் பலர் நடித்துள்ளனர்.
சான் ரோல்டன் படத்துக்கு இசையமைக்கிறார். ஆர்.டி.ராஜசேகர் ஒளிப்பதிவு செய்யும் படத்துக்கு ஜி மதன் படத்தொகுப்பு செய்கிறார். கடந்த ஆண்டு செப்டம்பர் மாதம் இப்படத்தின் படப்பிடிப்பு தொடங்கியது. 'கோலமாவு கோகிலா' படத்துக்கு பிறகு யோகிபாபு நயன்தாராவுடன் இப்படத்தில் நடித்துள்ளார்.
இந்த நிலையில் இப்படத்தின் படப்பிடிப்பு நிறைவடைந்துள்ளதாக படக்குழு அறிவித்துள்ளது. இதனை நயன்தாரா உள்ளிட்ட படக்குழுவினர் கேக் வெட்டி கொண்டாடியுள்ளனர். இது தொடர்பான புகைப்படங்கள் வெளியாகியுள்ளன.