இந்தியில் முன்னணி கதாநாயகனாக இருக்கும் சல்மான்கானுக்கு 57 வயது ஆகிறது. இன்னும் திருமணம் செய்து கொள்ளவில்லை. ஏற்கனவே சக நடிகைகளுடன் இணைத்து கிசுகிசுக்கப்பட்டார், இந்த நிலையில் சல்மான்கானுக்கும், பூஜா ஹெக்டேவுக்கும் காதல் மலர்ந்துள்ளதாக தகவல் பரவி வருகிறது.
சல்மான்கானுடன் கிஸி கா பாய் கிஸி கி ஜான் இந்தி படத்தில் பூஜா ஹெக்டே ஜோடியாக நடித்துள்ளார். இந்த படத்தை சல்மான்கானே தயாரித்து இருக்கிறார். தான் தயாரிக்கும் இன்னொரு படத்திலும் பூஜா ஹெக்டேவை கதாநாயகியாக ஒப்பந்தம் செய்துள்ளார்.
கடந்த சில நாட்களாக இருவரும் ஜோடியாக சுற்றி வருவதாகவும், விரைவில் திருமணம் செய்து கொள்ள திட்டமிட்டு இருப்பதாகவும் திரையுலகில் பேச்சு நிலவுகிறது. சல்மான்கானை காதலிக்கிறீர்களா என்று பூஜா ஹெக்டேவிடம் கேட்டபோது, "நான் இன்னும் தனியாகத்தான் இருக்கிறேன். தனியாக இருப்பது எனக்கு மகிழ்ச்சியாக உள்ளது. சினிமாவில் நடிப்பதில் மட்டுமே எனது முழு கவனமும் உள்ளது''என்றார்.
அவர் மறுத்தாலும் இருவரும் காதலிப்பது உண்மைதான் என்று இந்தி திரையுலகினர் கிசுகிசுக்கிறார்கள். பூஜா ஹெக்டே தமிழில் ஜீவாவுடன் முகமூடி, விஜய் ஜோடியாக பீஸ்ட் படங்களில் நடித்து இருக்கிறார்.