சென்னை,
பிரபல தயாரிப்பாளர் கதிரேசன் இயக்குனராக அறிமுகமாகும் திரைப்படம் 'ருத்ரன்'. இந்த படத்தில் நடிகர் ராகவா லாரன்ஸ் கதாநாயகனாக நடிக்கிறார். பிரியா பவானி சங்கர் கதாநாயகியாக நடிக்கிறார். சரத்குமார் முக்கிய கதாபாத்திரத்தில் நடிக்கிறார். ஆக்சன் வகை திரைப்படமாக உருவாகியுள்ள 'ருத்ரன்' படத்திற்கு இசையமைப்பாளர் ஜி.வி.பிரகாஷ் குமார் இசையமைக்கிறார்.
இந்த நிலையில் இந்த திரைப்படத்தின் பர்ஸ்ட்லுக் போஸ்டர் தற்போது வெளியாகி உள்ளது. கையில் ஆயுதத்துடன் ஒருவரை அடித்து ஆக்ரோஷமான பார்வையுடன் பிரம்மாண்டமான ராட்டினத்திற்கு முன்னால் நிற்பது போன்ற பர்ஸ்ட்லுக் போஸ்டர் இணையத்தில் வைரலாகி வருகிறது.
இந்த ஆண்டு கிறிஸ்மசை ஒட்டி 'ருத்ரன்' திரைப்படம் வெளியாகும் என்று தகவல் வெளியாகி உள்ளது. 'ருத்ரன்' படத்தை தொடர்ந்து ராகவா லாரன்ஸ், துரை செந்தில்குமார் இயக்கத்தில் 'அதிகாரம்' மற்றும் பி வாசு இயக்கத்தில் 'சந்திரமுகி 2' ஆகிய படங்களில் நடிக்கிறார். 'அதிகாரம்' படத்தின் படப்பிடிப்பு பாதி முடிந்துள்ள நிலையில், 'சந்திரமுகி 2' படத்தின் படப்பிடிப்பு விரைவில் தொடங்க உள்ளது.