சென்னை,
தமிழில் விஷால் நடித்த 'திமிரு' மற்றும் வசந்தபாலன் இயக்கத்தில் வெளியான 'வெயில்' உள்ளிட்ட படங்களின் மூலம் பிரபலமானவர் ஸ்ரேயா ரெட்டி. 'திமிரு' படத்தில் அவர் நடித்திருந்த வில்லி கதாபாத்திரம் அனைவரது மனதிலும் பதிந்தது. பின்னர் விஷாலின் அண்ணன் விக்ரம் கிருஷ்ணாவை திருமணம் செய்துகொண்டார்.
திருமணத்துக்குப் பிறகும் சில படங்களில் நடித்தார். தற்போது வேல்மதி இயக்கத்தில் 'அண்டாவ காணோம்' படத்தில் பிரதான கதாபாத்திரத்தில் நடித்துள்ளார். இப்படத்தை ஜெ.சதீஷ்குமார் தயாரித்துள்ளார். இந்தப் படம் பல முறை ரிலீஸ்தேதி அறிவிக்கப்பட்டு ஒத்தி வைக்கப்பட்டது. இந்நிலையில், ரிலீஸ் குறித்த அப்டேட்டை படக்குழு வெளியிட்டுள்ளது.
அதன்படி, 'அண்டாவ காணோம்' திரைப்படம் வருகிற ஜூன் மாதம் திரையரங்குகளில் வெளியாகும் என்று தெரிவித்துள்ளது. படத்தின் தயாரிப்பாளர் ஜெ.சதீஷ்குமார் போஸ்டர் வெளியிட்டு இதனை தெரிவித்துள்ளார்.