தமிழில் கடந்த 2021-ம் ஆண்டு நடிகர் ரவிமோகனுக்கு ஜோடியாக ''பூமி'' படத்தின் மூலம் அறிமுகமான நடிகை நிதி அகர்வால் தனது 32வது பிறந்தநாளை இன்று கொண்டாடுகிறார். பாலிவுட்டில் கடந்த 2016-ல் சபீர் கான் இயக்கத்தில் வெளியான முன்னா மைக்கேல் படத்தில் நடித்திருந்த நிதி அகர்வால், தொடர்ந்து 2018ல் தெலுங்கில் சவ்யஸச்சி உள்ளிட்ட படங்களில் நடித்தார். தமிழில் சிம்புவுடன் ''ஈஸ்வரன்'' படத்தில் நடித்து ரசிகர்களை கவர்ந்த நிதி சமூக வலைதளத்தில் ஆக்டிவாக இருந்து புகைப்படங்களை வெளியிட்டு வருகிறார்.

நிதி அகர்வால், தன்னுடைய 32வது பிறந்த நாளை இன்று கொண்டாடுகிறார். இதனால் சமூக வலைதளங்களில் ரசிகர்கள் அவருக்கு வாழ்த்து தெரிவித்து வருகிறார்கள்.

தெலுங்கு திரை உலகில் முன்னணி நடிகராக இருந்துவருபவர் பிரபாஸ். இவரது நடிப்பில் சமீபத்தில் 'கல்கி 2898 ஏடி' படம் மாபெரும் வெற்றி பெற்று வசூலை வாரி குவித்தது. அதனை அடுத்து தற்போது, மாருதி இயக்கத்தில் ஹாரர் காமெடி கதைக்களத்தில் உருவாகும் 'தி ராஜா சாப்' படத்தில் நடித்து வருகிறார். பீப்பிள் மீடியா பேக்டரி மற்றும் ஜிஎஸ்கே மீடியா ஆகிய தயாரிப்பு நிறுவனங்கள் இணைந்து இந்த படத்தினை தயாரிக்கிறது. இப்படத்தில் மாளவிகா மோகனன், நிதி அகர்வால், யோகி பாபு ஆகியோர் முக்கிய கதாபாத்திரங்களில் நடித்து வருகின்றனர். தமன் இசையமைத்து வருகிறார்.

இந்தநிலையில், நிதி அகர்வால் பிறந்தநாளையொட்டி ‘தி ராஜா சாப்’ படத்தின் சிறப்பு போஸ்டரை படக்குழு வெளியிட்டுள்ளது. காமெடி கலந்த ஹாரர் கதைக்களத்தில் உருவாகிவரும் இப்படம் வருகிற டிசம்பர் மாதம் 5-ம் தேதி வெளியாக உள்ளது.